عقلمند خرگوش Intelligent Rabbit

دوسرے جانوروں نے کہا: اے گدھے ہماری بات مان جاتو اپنی قدر پہچان، ’’چھوٹا منہ بڑی بات‘‘، یہ کام تمہارے بس کا نہیں۔ خرگوش نے کہا: ’’خدا چیونٹی سے ہاتھی مروا سکتا ہے، ذرا صبر سے کام لو اور دیکھو کہ پردۂ غیب سے کیا ظہور میں آتا ہے۔‘‘
وہ کہنے لگا دوستو! مجھے خدا نے الہام کیاہے، مجھ جیسے ایک کمزور کے ذہن میں ایک مضبوط رائے آگئی ہے۔ جانوروں نے اس سے پوچھا تمہارے ذہن میں کونسی بات آئی ہے؟ ہمیں بھی اس سے آگاہ کر… مشورہ کر لینا عقلمندی ہے۔ اس سے مزید روشن پہلو سامنے آجاتے ہیں۔ خرگوش نے کہا! راز برسرِعام کھولنا بے وقوفی ہے کیونکہ اس سے جان کا خطرہ ہوتا ہے۔ اس نے کہا! ہر راز کہنے کے لائق نہیں ہوتا۔ مولانا رومؒ  فرماتے ہیں:
ان تین چیزوں کے متعلق لب کشائی نہیں کرنی چاہیے ذہاب (سفر) ذہب ( سونا یعنی مال دولت ) اور مذہب (منزل) یہاں مذہب سے مراد منزل لی گئی ہے اس سے یہاں دین مراد لینا مناسب نہیں (کیونکہ ان تینوں چیزوں کے دشمن اور مخالف بہت ہوتے ہیں)۔
( خرگوش گھر بیٹھا رہا) اور وقتِ مقررہ سے تقریباً ایک گھنٹہ تاخیر سے روانہ ہوا۔ شیر کو جب وقت مقررہ پر خوراک نہ ملی تو اس کے غیظ و غضب کی انتہا نہ رہی۔ بار بار زمین پر پنجے مارتا اور کہتا کہ افسوس میں ان کمینوں کی چکنی چپڑی باتوں میں آگیا۔ نا اہل حکمران جب موقع محل کے مطابق فیصلہ نہیں کرتا تو پھر اپنی اس بے وقوفی کے سبب پریشانی اُٹھاتا ہے۔ شیر غصے کی حالت میں گرج رہا تھا۔ اس نے دور سے خرگوش کو تیزی سے اپنی طرف آتے دیکھا۔ جب وہ قریب آیا تو شیر نے غرّا کر کہا: اے کمینے نابکار! تو نے اتنی دیر کیوں لگا دی؟ خرگوش نے دست بستہ عرض کیا کہ اے بادشاہ سلامت! اگر جان کی امان پاؤں تو دیر سے آنے کی وجہ بیان کروں؟ اے جنگل کے بادشاہ تم پر ہم سب جانور قربان۔۔۔ آج میں اور میرا ایک بھائی خوانِ شاہی کے لئے روانہ ہوئے تو راستے میں ایک اور شیر نے ہمیں آگھیرا۔ اس نے ہم دونوں کو لقمہ تر بنانا چاہا۔ ہم نے اسے بتایا کہ ہم اپنے شہنشاہ کی طرف جارہے ہیں اور ہمیں وقت پر پہنچناہے۔ اس نے کہا ’’بادشاہ میں ہوں تمہیں اور کسی کے پاس جانے کی ضرورت نہیں۔‘‘ اس نے میرے ساتھی کو، جو مجھ سے زیادہ خوبرو اور صحت مند تھا،پکڑ لیا اور میں بڑی مشکل سے جان بچا کر ادھر بھاگ آیا۔ میں نے اس سے کہا تو مجھے چھوڑ دے تا کہ میں اپنے بادشاہ کی زیارت کر لوں اور اسے تیرے متعلق آگاہ کر دوں۔ اے بادشاہ سلامت! آئندہ اس شیر کی وجہ سے راستہ بند ہو گیاہے اگر تو معمول کے مطابق روزی چاہتا ہے تو پہلے ہمارا یہ راستہ صاف کرو۔ خرگوش کی یہ باتیں سن کر شیر کا خون کھول اُٹھا اور غضبناک ہو کر کہنے لگا:
’’وہ کون ہے جس نے میری عملداری میں قدم رکھا اور میرا شکار چھین لیا؟ میں جب تک اس کاکام تمام نہ کرلوں، کھانا حرام سمجھوں گا۔ اے خرگوش میرے ساتھ چل اور مجھے اس نابکار کا پتہ دے۔‘‘