راہِ فقر اور والدین کا کردار Rah E Faqr Aur Walidain Ka Kirdar

تحریر: مسز فاطمہ برہان سروری قادری۔ لاہور

انسان کی شخصیت، اس کے کردار کا انحصار اور اس کی جڑیں اس کے بچپن میں پیوست ہوتی ہیں۔ انسان کی فکر اور سوچ کا بیج بچپن میں بویا جاتا ہے اور اس کے کردار کا حسن اور نقص اس کے بچپن میں کی گئی تخم ریزی کا نتیجہ ہوتا ہے۔ درحقیقت بچپن بنیادہے جس پر زندگی کی عمارت استوار ہوتی ہے۔ اگر بنیاد مضبوط ہو تو عمارت بھی تند و تیز ہواؤں میں مضبوطی کے ساتھ کھڑی رہتی ہے۔ 

بچپن میں بچے کی تربیت کی پہلی درسگاہ والدین ہوتے ہیں۔ عقائد کی درستی، اچھے اور برُے میں تمیز، ظاہری و باطنی تربیت کا دارومدار سب والدین پر ہوتا ہے۔ جب بچہ پیدا ہوتا ہے اس کا دماغ خالی ہوتا ہے، وہ جس ماحول میں پرورش پاتا ہے اسی کو تربیت کے طور پر جذب کرتا ہے اور اسی کے مطابق کردار سازی کے عمل کا آغاز ہوتا ہے۔ 

 اولاد کی تربیت سے متعلق حدیثِ مبارکہ ہے:
والدین اپنی اولاد کو جو بہترین تحفہ دیتے ہیں وہ ان کی اچھی تربیت ہے۔ (مشکوٰۃ المصابیح۔4977)

سادہ اور آسان الفاط میں تربیت سے مراد ہے برُے اخلاق و عادات اورغلط ماحول کو اچھے اخلاق و عادات اور ایک صالح و پاکیزہ ماحول سے تبدیل کردینا۔بچے کو نفسیاتی، اخلاقی، عملی، اعتقادی، دینی اور روحانی طور پر تیار کرنا تا کہ وہ دین ودنیا دونوں میں کامیاب و کامران ہو سکے۔  

حضرت امام غزالیؒ اولاد کی تربیت کے متعلق فرماتے ہیں:
بچے والدین کے پاس امانت ہیں، ان کا پاکیزہ دل ایک قیمتی جو ہر ہے، بچوں کو بھلائی(اچھے کام) کا عادی بنایا جائے اور اچھی تعلیم دی جائے تو بچے اس نہج پر پروان چڑھتے ہیں جس کی بدولت دنیا و آخرت میں سعادت حاصل کرتے ہیں۔ اور اگر بچوں کو برُی باتوں کا عادی بنایا جائے یا ان کی تربیت سے غفلت برتی جائے اور انہیں جانوروں کی طرح آزاد چھوڑ دیا جائے تو بد بختی و بربادی ان کا مقدر بن جاتی ہے۔ (بچوں کی تربیت اور اس کے بنیادی اصول) 

بچے کی تربیت کا آغاز اور طرزِ فکر کی تشکیل کا عمل رحمِ مادر سے شروع ہو جاتا ہے۔ ماں جو سوچتی ہے اس کا اثر بچوں پر ہوتا ہے۔ بچے کی ذہنی تربیت اور اسے روحانی اقدار سے آشنا کرنے کے لیے ماں کا کردار بہت ضروری ہے۔ ماں اگر مثبت سوچ رکھے گی تو اس کے جسم میں صحت بخش اور پرُسکون لہریں گردش کریں گی اور یہی لہریں بچے کی طرزِ فکر کا حصہ بن جائیں گی۔ اس لیے عورتوں کو اس خاص مدت (نو ماہ) میں مثبت سوچ رکھنے، زیادہ دینی کاموں میں مشغول رہنے، نیک سیرت اپنانے اور محبتِ الٰہی سے دلوں کو روشن رکھنے کی تلقین کی جاتی ہے۔

بچپن کا عرصہ گزار کر جب بچہ لڑکپن کی جانب قدم بڑھاتا ہے تو والدین کی دینی، اخلاقی اور تعلیمی ذمہ داریاں بڑھ جاتی ہیں۔ جب بچے کے مزاج میں پختگی پیداہونا شروع ہو تو والدین کو چاہیے کہ بچے میں سب سے پہلے دین کی محبت پیدا کریں، اللہ کے ساتھ باطنی تعلق مضبوط کرنے کی کوشش کریں، دینی کاموں اور فرائض کی ادائیگی کی جانب رغبت دلائیں۔ اللہ تبارک و تعالیٰ پر ایمان، اس کی عظیم قدرت اور آفاق میں پھیلی اس کی عظیم الشان نشانیوں کی جانب بچوں کو غورو فکر کرنے کی ترغیب دلائی جائے۔ ان میں اس چیز کا احساس پیدا کیا جائے کہ اللہ تبارک وتعالیٰ تمام حرکات و سکنات کو دیکھ رہا ہے۔ اس کے ساتھ ساتھ بچوں میں خشوع و خضوع، تقویٰ، خشیتِ الٰہی اور عبدیت کی روح کو زندہ کیاجائے۔ اکثر یہ بھی دیکھا گیا ہے کہ بچے میں صرف اللہ کے خوف کے جذبے کو ابھارا جاتا ہے جبکہ ہمارا دین خوف اور امید کے درمیان ہے۔ اللہ کا خوف دل میں پیدا کرنے کے ساتھ ساتھ اللہ کے رحیم و کریم ہونے کا جذبہ بھی دل میں پیدا کرنا ضروری ہے۔ 

ہمارے معاشرے کا سب سے بڑا المیہ یہ ہے کہ بچے کی ظاہری تعلیم و تربیت پر حد سے زیادہ توجہ دی جاتی ہے، اسے بڑا آدمی بنانے اور اس کے روشن مستقبل کی خاطر ہر ممکن کوشش کی جاتی ہے لیکن اس کی دینی و روحانی تربیت کو پس ِپشت ڈال دیا جاتا ہے۔ والدین کا بچے پر احسانِ عظیم یہ ہے کہ انہیں دین کی اصل حقیقت کے متعلق آگاہی دی جائے۔ انہیں احساس دلایا جائے کہ انسان صرف گوشت پوست سے بنا وجود نہیں بلکہ اس کا ایک باطنی وجود بھی ہے۔ انسان کی تخلیق دو چیزوں کا مرکب ہے نفس اور روح۔ روح کی پہچان ہی درحقیقت دین کی حقیقت اور رمز ہے، اسی کو عرفانِ نفس اور خودی کی پہچان کہتے ہیں۔ سلطان العاشقین حضرت سخی سلطان محمد نجیب الرحمٰن مدظلہ الاقدس جس طرح دین کی حقیقت کے متعلق رہنمائی فرماتے ہیں وہ تمام والدین کے لیے مشعلِ راہ ہے ۔ آپ مدظلہ الاقدس فرماتے ہیں :
دین کے معنی ہیں ’’جوہر ِ انسان (روح) کی شناخت اور اس کی تکمیل ‘‘ یعنی مرتبۂ انسان کی پہچان اور اس کے حصول کا نام دین ہے۔ (فقرِ اقبال)

دین کی اصل حقیقت سے واقف کرانے کے لیے ضروری ہے کہ اولاد کو راہِ فقر کے متعلق رہنمائی دی جائے کیونکہ اسی راہ پر چل کر ’’روح‘‘ کی شناخت اور’’ مرتبۂ انسان‘‘ کی پہچان ہو سکتی ہے۔ فقر کے متعلق حضور علیہ الصلوٰۃ والسلام کی احادیث ہیں:
اَلْفَقْرُ فَخْرِیْ وَالْفَقْرُ مِنِّیْ 
ترجمہ: فقر میرا فخر ہے اور فقر مجھ سے ہے ۔
اَلْفَقْرُ فَخْرِیْ وَالْفَقْرُ مِنِّی فَافْتَخِرُّبِہٖ عَلٰی سَآئِرِ الْاَنْبِیَّآئِ وَالْمُرْسَلِیْنَ 
ترجمہ: فقر میرا فخر ہے اور فقر مجھ سے ہے ۔ اور فقر ہی کی بدولت مجھے تمام انبیا و مرسلین پر فضیلت حاصل ہے ۔ 
اَلْفَقْرُ کَنْزٌ مِنْ کُنُوْزِ  اللّٰہِ تَعَالٰی 
ترجمہ:فقر اللہ تعالیٰ کے خزانوں میں سے ایک خزانہ ہے ۔ 

دین کی اصل حقیقت راہِ فقر ہے اور راہِ فقر کی اصل بنیاد ’’طلبِ مولیٰ‘‘ ہے۔ یعنی اولاد کی باطنی تربیت کے دو بنیادی پہلو ہیں، اوّل انہیں راہِ فقر کی ترغیب دی جائے دوم طلبِ مولیٰ کا جذبہ پیدا کیا جائے۔ یعنی اللہ کی عبادت جنت کے حصول کے لیے نہیں اور نہ ہی جہنم کے خوف سے کی جائے بلکہ اللہ کی عبادت اس لیے کی جائے کہ اللہ کی ذات ہی عبادت کے لائق ہے۔ تمام عبادات کا مقصداللہ پاک کی رضا اور خوشنودی ہونا چاہیے۔ حضور علیہ الصلوٰۃ والسلام کا ارشاد ہے :
دنیا اہلِ عقبیٰ پر حرام ہے، عقبیٰ اہلِ دنیا پر حرام ہے اور طالبِ مولیٰ پر دنیا و عقبی دونوں حرام ہیں ۔ جسے مولیٰ مل گیا سب کچھ اسی کا ہو گیا۔

حدیثِ قدسی میں اس طرح بیان کیا گیا ہے:
 دنیا کا طالب (مخنث ) ہیجڑہ ہے، عقبیٰ کا طالب (مؤنث) عورت ہے اور طالبِ مولیٰ مذکر (مرد) ہے ۔  

حضرت علی کرم اللہ وجہہ کا فرمان ہے :
میں اللہ تعالیٰ کی عبادت جنت کی طلب یا دوزخ کے خوف سے نہیں کرتا بلکہ میں اللہ کی عبادت اس لیے کرتا ہوں کیونکہ وہی عبادت کے لائق ہے ۔

موجودہ دور نفس پرستی اور مادہ پرستی کا ہے ۔نفسا نفسی کے اس عالم میں اولاد کو تعلیماتِ فقر کی ترغیب دلانا والدین کے لیے اصل آزمائش ہے اور یہی اصل تربیت ہے ۔ اولاد کی دنیوی اور اخروی کامیابی کے لیے والدین پر لازم ہے کہ اولاد کو یہ سوچ دی جائے کہ انسان کو کیوں پیدا کیا گیا ہے؟ اس کا اس دنیا میں بھیجے جانے کا مقصد کیا ہے؟ اسے کیوں دیگر مخلوقات میں ’’اشرف‘‘ ہونے کا درجہ حاصل ہے؟ درحقیقت انسان کو اس دنیا میں ایک عظیم مقصد کے حصول کے لیے بھیجا گیا ہے اور وہ مقصد دیدارِ الٰہی کی نعمت حاصل کرنا ہے۔ والدین کو چاہیے کہ وہ اپنی اولاد میں دیدارِ الٰہی کے لیے جستجو پیدا کریں اور اس مقصد کے حصول کے لیے درست راہ کا انتخاب کرنے میں ان کے معاون اور مددگار بنیں۔ جس دل میں طلبِ مولیٰ ہوتی ہے اسی دل میں دیدارِ الٰہی کا شوق اور جستجو پیدا ہوتی ہے۔

 حضرت سلطان باھوؒ کی تعلیمات کے مطابق راہِ فقر ہی وہ راہ ہے جس میں کامیا ب طالبِ مولیٰ کو ’’دیدارِ الٰہی ‘‘ کا شرف حاصل ہوتا ہے۔ آپؒ فرماتے ہیں :
فقر دیدارِ الٰہی کا علم ہے ۔ (عین الفقر)
جو شخص اللہ اور اس کا دیدار چاہتا ہے وہ فقر اختیار کرے۔ (عین الفقر)
تمام پیغمبروں نے فقر کے مرتبے کی التجا کی‘لیکن نہیں ملا۔ صرف سرورِ کائناتؐ کو حاصل ہوا جو آنحضرتؐ نے اپنی امت کے سپرد کیا ۔ یہ فقرِ محمدیؐ محض فیض ہے ۔ (امیر الکونین)