درود شریف کے فضائل Darood Sharif Kay Fazayl

ابو محمد مرجانیؓ فرماتے ہیں: اے مخاطب !نبی رحمت صلی اللہ علیہ وآلہٖ وسلم پر درود بھیجنے کا نفع حقیقت میں تیری ہی طرف لوٹتا ہے۔ گویا تو اپنے لیے دعا کر رہا ہے۔

علامہ ابنِ عربیؒ فرماتے ہیں کہ نبی کریم صلی اللہ علیہ وآلہٖ وسلم پر دورد بھیجنے کا فائدہ درود بھیجنے والے کی طرف لوٹتا ہے کیونکہ اس کا درود پڑھنا اس بات کی دلیل ہے کہ درود پڑھنے والے کا عقیدہ صاف ہے اور اس کی نیت خالص ہے اور اس کے دل میں نبی کریم صلی اللہ علیہ وآلہٖ وسلم کی عقیدت و محبت اور اسے اللہ تعالیٰ کی طرف سے نیکی پر مدد حاصل ہے اور اس کے اور اس کے آقا و مولیٰ دو عالم کے دولہا حضورصلی اللہ علیہ وآلہٖ وسلم کے درمیان ایک مبارک و مقدس نسبت موجود ہے۔ (القول البدیع، المقصود بالصلاۃ علی النبیؐ، ص 83 )

درود پاک کے متعلق شرعی احکامات

کسی مجلس میں سرکارِ دو عالم صلی اللہ علیہ وآلہٖ وسلم کا ذکر کیا جائے تو ذکر کرنے اور سننے والے کا ایک مرتبہ درود و سلام پڑھنا واجب ہے۔ اور اس سے زیادہ مستحب ہے اور نماز کے قعدہ اخیرہ میں تشہد کے بعد درود پڑھنا سنت ہے۔ 

حضور اقدس صلی اللہ علیہ وآلہٖ وسلم کے تابع کر کے آپ ؐ کی آل و اصحاب اور دوسرے مومنین پر بھی درود بھیجا جا سکتا ہے جبکہ سرکارِ دو عالم صلی اللہ علیہ وآلہٖ وسلم کے سوا ان میں سے کسی پر درود بھیجنا مکروہ ہے۔

درود شریف میں آل و اصحابؓ کا ذکر شروع سے چلتا آرہا ہے اور یہ بھی کہا گیا ہے کہ آل کے ذکر کے بغیر درود مقبول نہیں یعنی درود شریف میں حضور پرُ انوار صلی اللہ علیہ وآلہٖ وسلم کے اہلِ بیتؓ کو شامل کیا جائے۔ آلِ رسولؐ کون ہے اس کی طرف اشارہ کرتے ہوئے سرکارِ دو عالم صلی اللہ علیہ وآلہٖ وسلم نے فرمایا:
مَنْ سَلَکَ عَلٰی طَرِیْقیْ فَھُوَ اٰلی 
ترجمہ: جو چلا میری راہ وہی میری آل ہے۔

درود شریف اللہ تعالیٰ کی طرف سے نبی کریم صلی اللہ علیہ وآلہٖ وسلم کی عزت و تکریم ہے فقرا نے اللھم صلی علیٰ محمد  کے معنی یہ بیان کیے ہیں کہ یا ربّ! محمد مصطفی صلی اللہ علیہ وآلہٖ وسلم کوعظمت عطا فرما دنیا میں ان کا دین بلند کر کے، ان کی دعوت غالب فرما اور ان کے دین ان کے ورثہ فقر کو بقا عنایت کر کے اور دنیا و آخرت میں ان کی قربت و دیدار عطا فرما دنیا میں دائمی حضوری کی صورت میں اور آخرت میں شفاعت و حاضری کی صورت میں۔
خطبے میں حضور اقدس ؐ کا نام پاک سن کر دل میں درود پڑھیں ، زبان سے سکوت فرض ہے۔
اللہ تعالیٰ نے درود و سلام پڑھنے کے لیے کسی وقت اور خاص حالت مثلا ًکھڑے ہو کر یا بیٹھ کر پڑھنے کی قید نہیں لگائی چنانچہ کھڑے ہو کر یا بیٹھ کر ، جہاں چاہے جس طرح چاہے نمازسے قبل یا بعد یونہی اذان سے پہلے یا بعد جب چاہے درود پڑھنا جائز ہے۔

حقائقِ درود پاک

واصف علی واصف لکھتے ہیں:
اللہ اور اس کے فرشتے جو پڑھتے ہیں وہ آپ بھی پڑھنا شروع کر دیں پھر آپ بھی خاموشی سے اللہ کے ساتھ اس جماعت میں شامل ہو جائیں گے جس کے بارے میں اللہ کہتا ہے کہ میں اورمیرے فرشتے ایک کام کر رہے ہیں یعنی درود شریف پڑھتے ہیں آپ بھی وہ کام شروع کر دیں۔
مزید ایک جگہ آپؒ فرماتے ہیں:
درود پاک ذکر ہے یاد ہے حضور پاک صلی اللہ علیہ وآلہٖ وسلم کی۔

قرآنِ مجید میں ارشادِ باری تعالیٰ ہے:
 اور ہم نے آپ صلی اللہ علیہ وآلہٖ وسلم کا ذکر بلند فرما دیا ہے۔ (سورۃ الم نشرح۔4)

 اللہ ربّ العزت نے نبی اکرم صلی اللہ علیہ وآلہٖ وسلم کا ذکر تمام عالموں میں بلندکیاہے کیونکہ حضرت محمد صلی اللہ علیہ وآلہٖ وسلم رحمت اللعالمین ہیں توآپؐ کا ذکر بھی تمام عالموں میں بلند فرمایا گیا۔ اللہ ربّ العزت نے سرکار ِدو عالم کے ذکر کو اس طرح بلند کیا ہے کہ اپنے ذکر کے ساتھ ذکرِ مصطفی صلی اللہ علیہ وآلہٖ وسلم کولازم کر دیا ہے۔

حضرت عبداللہ بن عباس فرماتے ہیں کہ اللہ تعالیٰ نے حضور علیہ الصلوٰۃ والسلام سے فرمایا:
اے محمد صلی اللہ علیہ وآلہٖ وسلم جہاں میرا ذکر ہوتا ہے وہاں آپ صلی اللہ علیہ وآلہٖ وسلم کا ذکر بھی ہوتا ہے جس نے میرا ذکر کیا مگر آپ صلی اللہ علیہ وآلہٖ وسلم کا ذکر نہیں کیا، جنت میں اس کا کوئی حصہ نہیں۔ (در منشور جلد 6 صفحہ 401)

سلطان العاشقین حضرت سخی سلطان محمد نجیب الرحمن مدظلہ الاقدس اپنی تصنیفِ لطیف حقیقتِ محمدیہ میں رقم طراز ہیں:
درود وہ ذکر اور عبادت ہے جو ہر عبادت کو بارگاہِ الٰہی میں مقبول بناتی ہے کیونکہ ہر فرقہ اور مسلک کے لوگوں کا عقیدہ ہے کہ اگر دعا یا کسی عبادت کے اوّل و آخر درود شریف پڑھ لیا جائے تو عبادت اور دعا ضرور قبول ہو جاتی ہے پس فرمایا کہ مجھ سے کچھ مانگنا ہے تو پہلے میرے محبوب پر درود بھیجو۔ میرے محبوب کا ذکر کرو پھر قبول کروں گا۔ یہ ہے ایک اور طریقہ محبوب کے ذکر کو بلند کرنے کا۔درود و سلام سرکارِ دو عالم صلی اللہ علیہ وآلہٖ وسلم کی تعریف میں نذرانہ عقیدت پیش کرنا اور آپ صلی اللہ علیہ وآلہٖ وسلم کی عظیم الشان ہستی کے اوصافِ حمیدہ بیان کرنے کا نام ہے۔ یہ ایسی عبادت ہے جو اللہ تعالیٰ، فرشتے اہل ایمان اور حتیٰ کہ تمام مخلوقات کرتے ہیں۔(حقیقتِ محمدیہ)

الغرض اللہ نے صرف اپنے حبیب ؐ کا ذکر ہی بلند نہ کیا بلکہ جس نے بھی اللہ کے حبیب کو اپنا محبوب جانا اس کا بھی ذکر بلند کیا۔ جس کی  زندہ مثالیں حضرت ابوبکرصدیقؓ، حضرت عمر فاروقؓ، حضرت عثمان غنیؓ، حضرت علی کرم اللہ وجہہ، حضرت بلال حبشیؓ، حضرت اویس قرنیؓ سمیت تمام اصحاب کی صورت میں منہ بولتا ثبوت ہے۔ پھر جیسا کہ ہم ان تمام دلائل کے متعلق آگاہی حاصل کر چکے ہیں کہ نبی اکرم صلی اللہ علیہ وآلہٖ وسلم کا ذکر ازل تا ابد قائم رہے گا لہٰذا اللہ نے عاشقانِ رسول صلی اللہ علیہ وآلہٖ وسلم کے ذکر کو بلند کرنے کی صورت میں ذکر ِمحمدی صلی اللہ علیہ وآلہٖ وسلم کو حیات ِجاودانی بخشی۔ حتیٰ کہ صحابہ کرامؓ کے بعد جس زمانہ میں جس شخص نے آپ صلی اللہ علیہ وآلہٖ وسلم کا قرب حاصل کیا اور جتنا قریب ہوا اور آپ صلی اللہ علیہ وآلہٖ وسلم کو اپنا محبوب بنایا، خود کو آپؐ کی ذات میں فنا کر دیا وہ اللہ کا ولی اور آپ صلی اللہ علیہ وآلہٖ وسلم کا محبوب ہو گیااور اس کا نام بھی بلند ہو گیا۔ اگر نہیں اعتبار تو صدیوں سے قائم اولیا اللہ کے مزارات کو دیکھ لیں کہ دشمن خواہ جتنی مرضی مخالفت کرتے ہیں وقت گزرنے کے ساتھ ساتھ ان کا ذکر اتنا ہی بلند ہوتا جا رہا ہے۔

میرے مرشد میرے ہادی سلطان العاشقین حضرت سخی سلطان محمد نجیب الرحمٰن مدظلہ الاقدس فرماتے ہیں:
جو بھی صدقِ دل اور صحیح عقیدے سے ایک بار خود کو آپ صلی اللہ علیہ وآلہٖ وسلم سے وابستہ کر لے گا وہ بھی بلند ہو جائے گا۔ یہ ذکر بلند سے بلند تر ہوتا رہے گا۔ کیونکہ اس کی جبلت میں بلند ہونا ہے اور اپنے وابستگان کو بھی بلند سے بلند تر کرتا ہے اور کرتا رہے گا کیونکہ اسے بلند کرنے کا ذمہ اس نے لیا ہے جو کائنات کی ہر شے سے بلند و برتر ہے۔

استفادہ کتب:
۱۔ شمس الفقرا: تصنیفِ لطیف سلطان العاشقین حضرت سخی سلطان محمد نجیب الرحمٰن مدظلہ الاقدس
۲۔  حقیقتِ محمدیہ:  ایضاً