توبہ Touba

 توبہ کی اقسام

امام المتقین سیدّناحضرت علی کرم اللہ وجہہ فرماتے ہیں:
تعجب ہے اس انسان پر جو نجات کا سامان رکھتے ہوئے ہلاک ہورہا ہو۔ پوچھا گیا ’’وہ سامان کیا ہے؟‘‘ فرمایا ’’توبہ و استغفار کرنا۔‘‘ (توبہ و تقویٰ)

سیدّنا غوث الاعظمؓ فرماتے ہیں:
توبہ دو قسم کی ہے ، توبہ ظاہر اورتوبہ باطن۔توبہ ظاہر یہ ہے کہ انسان اپنے تمام اعضائے ظاہری کو قولاً و فعلاً گناہ اور معصیت سے طاعت کی طرف اور مخالفات سے موافقات کی طرف موڑ دے اور توبہ باطن یہ ہے کہ انسان تصفیہ ٔقلب کی طرف رجوع کرے۔ (سرّالاسرار۔ فصل6)

ظاہری توبہ میں آنکھ، زبان، کان، ہاتھ اور پاؤں سے کئے جانے والے گناہوں سے توبہ شامل ہے لیکن جب تک باطنی توبہ حاصل نہ ہو ظاہری توبہ بھی فائدہ مند نہیں۔ اس کی وجہ یہ ہے کہ باطنی توبہ سے ہی انسانی قلب حقیقی معنی میں اللہ تعالیٰ کی عظمت و کبریائی کا اقرار کر کے خود کو اس کی بارگاہ میں عاجز و حقیر تسلیم کرتے ہوئے تمام سابقہ گناہوں سے مکمل طور پر معافی کا طلبگار رہتا ہے۔ ارشادِ باری تعالیٰ ہے:
یٰٓاَیُّھَا الَّذِیْنَ اٰمَنُوْا تُوْبُوْٓا اِلَی اللّٰہِ تَوْبَۃً نَّصُوْحًا۔  (سورۃ التحریم۔8)
ترجمہ: اے ایمان والو! تم اللہ کے حضور رجوعِ کامل سے خالص توبہ کر لو۔

حضرت شاہ محمدذوقیؒ اپنی تصنیف ’’سِرّدلبراں‘‘ میں باطنی توبہ کے چند لوازمات یوں تحریر فرماتے ہیں:
صرف زبان سے توبہ و استغفار کا رَٹنا اور دل کا اس سے غافل رہنا اس باب الابواب کو کھلوانے کے لیے کافی نہیں ۔
عزمِ مصمم کہ اب کبھی عمر بھر اس گناہ کا اعادہ نہ کیا جائے گا۔ اس عزم کی پختگی کے ساتھ جو توبہ کی جاتی ہے اسے ’’توبۃ النصوح‘‘ کہتے ہیں۔
آپؒ توبہ کی مزید اقسام تحریر فرماتے ہیں:
۱) ایسی توبہ جس میں ایسی قلبی ندامت ہو، جو رغبت سے پیدا ہوتی ہے اس توبہ کو ’’اَنابت‘‘کہتے ہیں۔یعنی صغیرہ گناہوں کے بعد اللہ کی رحمت پر یقین رکھتے ہوئے محبت و عاجزی کے ساتھ اس کی طرف رجوع کرنا اَنابت ہے۔

۲) وہ توبہ جس میں ایسی ندامت ہو جو عظمت و جبروت سے پیدا ہو، اُسے ’’اوبہ‘‘ کہتے ہیں۔ یعنی ایسی توبہ جس میں نفس تائب ہو کر اللہ تعالیٰ کی عظمت کا اقرار کرتے ہوئے اس کی طرف رجوع کرے۔ (سِرّدلبراں)

سیدّنا غوث الاعظمؓ فرماتے ہیں:
جب تک تو اپنے باطن سے توبہ نہ کرے اور باطنی صدق و اخلاص پیدا نہ کرے اس وقت تک تیرے ظاہر کا اعتبار نہیں ۔ (الفتح الربانی۔ ملفوظاتِ غوثیہ)

کن لوگوں کی توبہ قبول نہیں ہوتی ؟

امام الوقت مرشد کامل اکمل سلطان العاشقین حضرت سخی سلطان محمد نجیب الرحمٰن مدظلہ الاقدس فرماتے ہیں اللہ تعالیٰ ان لوگوں کی توبہ قبول نہیں کرتا جو:
۱) کلمہ گو کو کافر کہے
۲) صراطِ مستقیم پر چلنے والے کو گمراہ کرے
۳) گناہ کو جان بوجھ کر کرے۔ (سلطان العاشقین)

جو جانتے بوجھتے انبیا و فقراکاملین کی مخالفت کرے اور لوگوں کو بھی گمراہ کرے، ایسا شخص اللہ اور اللہ کے رسول ؐ اور فرشتوں کی جانب سے لعنت و رسوائی کا مستحق بنتاہے ۔ ایسے شخص کی بھی توبہ قبول نہیں ہوتی ۔ ان کے متعلق ارشادِ باری تعالیٰ ہے:
اللہ نے ان کے اپنے انتخاب کے نتیجے میں ان کے دلوں اور کانوں پر مہر لگا دی ہے اور ان کی آنکھوں پر پردہ ہے اور ان کے لیے عذابِ عظیم ہے۔ (سورۃ البقرہ۔7)
غافل دل سے مانگی ہوئی توبہ بھی قبول نہیں ہوتی۔
جس شخص کا خاتمہ بالخیر یعنی حالتِ ایمان میں نہ ہوا ہو،ایسے شخص کی بھی توبہ قبول نہیں ہوتی ۔
جو شخص اللہ تعالیٰ سے عناد کے ساتھ گناہ کرے، اس کی توبہ قبولیت کا درجہ نہیں رکھتی۔
حضرت اغرؓ سے روایت ہے کہ رسول اللہ صلی اللہ علیہ وآلہٖ وسلم نے فرمایا:
اے لوگو! اللہ کی طرف تائب ہو جاؤ اور اس سے بخشش طلب کرو ، میں روزانہ سو مرتبہ توبہ کرتا ہوں۔(مسلم6859)

سیدّنا غوث الاعظمؓ اپنے الہامی کلام ’’الرسالۃ الغوثیہ ‘‘ میں رقمطراز ہیں:
اللہ تعالیٰ نے مجھ سے فرمایا’’اے غوث الاعظمؓ! کوئی شخص مجھ سے اپنے گناہ کے باعث دور نہیں ہوتا اور نہ ہی کوئی اپنی طاعت کے باعث مجھ سے قریب ہوتا ہے۔ اے غوث الاعظمؓ! اگر کوئی مجھ سے قریب ہوتا ہے تو وہ اُن گناہگاروں میں سے ہوتا ہے جو عاجزی اور ندامت والے ہیں۔ اے غوث الاعظمؓ! عاجزی انوار کا منبع ہے اور عجب، تکبر، گناہوں کے غلبہ اور تاریکیوں کا منبع ہے۔‘‘ (الرسالۃ الغوثیہ)

انسان کا اپنے گناہوں پر نادم ہونااور توبہ کے ذریعے رجوع اِلی اللہ کرنا قلب کو معرفتِ الٰہی کی راہ پر گامزن کرتاہے تاہم اس کا حصول مرشد کامل اکمل جامع نورالہدیٰ کی رہبری و رہنمائی کے بغیر ناممکنات میں سے ہے کیونکہ راہِ معرفتِ الٰہی کے راہزن نفس اور شیطان ہیں۔ نفس انسان کے لیے صالح اس وقت بنتاہے جب اس کا تزکیہ ہو جائے اور تزکیۂ نفس کے لیے مرشد کامل اکمل کی تلاش و اطاعت ازحد ضروری ہے۔ ظاہری عبادات سے نہ تو تزکیۂ نفس حاصل ہوتاہے اور نہ ہی حقیقی توبہ پر قائم رہا جا سکتا ہے۔ اگر ایسا ممکن ہوتاتوبعد از حضور نبی مکرمؐ، تابعین کو( اصلاحِ نفس کے لیے) صحابہ کرامؓ کی اور تبع تابعین کو تابعین کی صحبت و اطاعت کی حاجت نہ ہوتی اور اللہ پاک اپنے جلیل القدر فقرا کو اصلاحِ انسانیت کے لیے یکے بعد دیگر ے منتخب نہ فرماتا اور نہ ہی ان اولیا وفقراکاملین کا شہرہ ہر زبان زَدِ عام ہوتا۔ارشادِ باری تعالیٰ ہے :
پیروی کرو اللہ کی اور پیروی کرو اللہ کے رسول صلی اللہ علیہ وآلہٖ وسلم کی اور اس کی جو تم میں ’’اُولی الامر‘‘ ہو۔ (سورۃ النسا۔59 ) 

اس آیت مبارکہ میں ’’اُولی الامر‘‘سے مراد دنیادارحکمران،بے عمل علما، امرا یا دیندار لوگ ہر گز نہیں ہیں۔اس کے متعلق امام الوقت مرشد کامل اکمل جامع نور الہدیٰ سلطان العاشقین حضرت سخی سلطان محمد نجیب الرحمٰن مدظلہ الاقدس فرماتے ہیں:
’’اولی الامر‘‘سے مراد وہ صدیق بندہ ہے جو نائبِ رسولؐ کے مرتبہ پر فائز ہوکیونکہ صرف اس کی پیروی حقیقتاً اللہ اور اس کے رسولؐ کی پیروی ہو گی نہ کہ دنیاوی حکمرانوں کی۔(شمس الفقرا)
عصرِحاضر میں قلب کو گناہوں کی آلودگی سے پاک کرنے اور توبۃ النصوح سے معرفتِ الٰہی کا حصول امام الوقت ،مجددِ دین مرشد کامل اکمل سلطان العاشقین حضرت سخی سلطان محمد نجیب الرحمٰن مدظلہ الاقدس کی صحبت و نگاہِ فیض اور ذکر و تصور اسمِ اللہ ذات سے ہی ممکن ہے۔ 

خردکے پاس خبر کے سوا کچھ اور نہیں
تیرا علاج نظر کے سوا کچھ اور نہیں

خواص و عوام کے لیے دعوتِ عام ہے کہ سلطان العاشقین مدظلہ الاقدس کی بارگاہ میں حاضر ہوکرصحبتِ مرشد سے قربِ الٰہی کی منازل طے کریں تاکہ اللہ تعالیٰ کی بارگاہ میں پیشی سے قبل اس کی رضا کا حصول ممکن ہو سکے جو کہ دائمی کامیابی کی کنجی ہے۔

استفادہ کتب:
سلطان العاشقین: ناشر سلطان الفقر پبلیکیشنز
مکاشفتہ القلوب :  امام محمد غزالیؒ
سِرّدلبراں:  حضرت شاہ محمدذوقیؒ
 توبہ و تقویٰ :  ابوشرجیل شفیق الرحمن الدراوی