حضرت علی کرم اللہ وجہہ کے دورِخلافت کی مشکلات Hazrat Ali r.a kay Dor-e-Khilafat ki Mushkilat

۱۰۔جہاں تک مصر کے حالات کی بات ہے تو وہاں حضرت عثمانؓ کے خلاف پروپیگنڈا اس قدر شدید تھا کہ لوگ جہاد کو چھوڑ کر خلافت کے معاملات کی اصلاح کرنا چاہتے تھے۔ محمد رضا مصری لکھتے ہیں:

لوگوں کے ذہنوں میں اس قسم کی باتیں اس قدر پختہ ہو گئیں کہ ان کے ذہنوں میں جہاد کی بجائے مدینہ کی اصلاح اہم مسئلہ بن گیا۔ لوگوں نے برملا حضرت عثمانؓ کی شان میں وہ باتیں کرنا شروع کر دیں جو پہلے کبھی نہ کہی گئی تھیں۔  (عثمانؓ بن عفان) 

۱۱)  کوفہ میں بھی سازش زوروں پر تھی۔ حضرت عثمانؓ جس کو بھی گورنر یا عامل مقرر کرتے لوگ اس پر اعتراض کرتے۔ آپ جو بھی قدم اٹھاتے وہ پروپیگنڈا کی نذر ہو جاتا۔ اس بات سے اندازہ لگائیے کہ آپؓ کو متعدد گورنر تبدیل کرنا پڑے جن کے خلاف کوئی شکایت نہ تھی بلکہ صرف اور صرف وجہ یہ تھی کہ فتنہ پرداز کہتے تھے کہ تبدیل کیا جائے۔ محمد رضا مصری اپنی کتاب ’’عثمانؓ بن عفان‘‘ میں لکھتے ہیں کہ جب حضرت عثمانؓ پر گورنر تبدیل کرنے کے لیے دباؤ ڈالا گیا تو انہوں نے فرمایا:
’’میں ان لوگوں کی یہ درخواست بھی منظور کئے دیتا ہوں تا کہ کل ان کے پاس کوئی حجت باقی نہ رہے۔‘‘

آگے لکھتے ہیں:
فتنہ پھوٹ چکا تھا اور قریب تھا کہ شعلے بھڑک اٹھیں اس لئے صحابہ کرام ؓنے ایک دوسرے کو واقعات کی نزاکت کے متعلق خطوط لکھے اور حضرت علیؓ سے درخواست کی کہ آپ حضرت عثمانؓ سے اس صورتحال پر گفتگو کریں۔ (عثمانؓ بن عفان)

اس صورتحال سے بھی بخوبی اندازہ ہوتا ہے کہ فتنہ کس قدر اثر انداز ہوچکا تھا۔ 

۱۲۔ سبائیوں کا فتنہ بھی کافی خطرناک تھا۔ اس کی ابتدا عبداللہ بن سبا سے ہوئی۔ یہ صنعائے یمن کا مکین تھا۔ چونکہ اس کی والدہ کا نام سودا تھا اسی بنیاد پر اسے ’’ابنِ سودا‘‘ بھی کہا جاتا تھا۔ وہ در حقیقت یہودی تھا لیکن اس نے حضرت عثمانؓ کے دورِ خلافت میں ریاکارانہ طور پر اسلام قبول کیا۔ اس کی تمام تر تحریکیں اور کاوشیں مسلم اُمہ میں تفرقہ پیدا کرنے کے لیے تھیں جس کے لئے اس نے نئے عقائد متعارف کروانا شروع کیے۔ اسکی وجہ یہ تھی کہ جب لوگوں کے عقائد ایک دوسرے سے مختلف ہو جاتے ہیں تو فرقوں کی بنیاد پڑ جاتی ہے،  اتحاد کو دیمک لگ جاتی ہے اور آخرکار قومیں زوال کا شکار ہو جاتی ہیں۔ مزید برآں عبداللہ ابنِ سبا نے اس طرح کے عقائد کی تبلیغ کی جن کو مسلمان جلدی قبول کر لیں اور جو تیزی سے انہیں زوال کی طرف لے جائیں۔ ان میں سے ایک عقیدہ یہ تھا کہ حضرت علیؓ ہی آپ صلی اللہ علیہ وآلہٖ وسلم کے وصی ہیں یعنی اصل میں خلافت انہی کو سزاوار ہے اس لیے جو دوسرا خلافت کا دعویٰ کرے وہ کاذب ہے۔اس سلسلے میں طبری لکھتے ہیں:
ابنِ سبا کہنے لگا کہ گزشتہ زمانے میں جب پیغمبر ہوتے تھے تو ہر پیغمبر کا وصی ہوتا تھا اس لئے حضرت محمد صلی اللہ علیہ وآلہٖ وسلم کے وصی حضرت علیؓ ہیں۔ آپ صلی اللہ علیہ وآلہٖ وسلم خاتم الانبیا ہیں اور علیؓ خاتم الاوصیا ہیں۔ اس سے زیادہ ظالم کون ہو گا جس نے رسول اللہ صلی اللہ علیہ وآلہٖ وسلم کی وصیت پر عمل نہیں کیا اور رسول اللہ صلی اللہ علیہ وآلہٖ وسلم کے حق کو غصب کر کے اُمتِ اسلامیہ کا انتظام اپنے ہاتھ میں لے لیا۔ حضرت عثمانؓ نے خلافت پر ناحق قبضہ کر لیا ہے۔ رسول اللہ صلی اللہ علیہ وآلہٖ وسلم کے وصی موجود ہیں اس لئے تم اس کام کے لئے اٹھ کھڑے ہو۔ اس کا آغاز اپنے حکام پر طعن و تشنیع سے کرو۔ (تاریخ طبری، جلد سوم، حصہ اوّل، ص 382)

 اس طرح حضرت علیؓ کا نام استعمال کر کے اس نے نومسلموں کو اپنے ساتھ ملا لیا۔ پہلے بیان کئے گئے معاملات کے ساتھ ساتھ جب عبداللہ بن سبا نے سازشیں شروع کیں تو حالات زیادہ تیزی سے خراب ہونے لگے۔ اس نے کوفہ، مصر، شام، بصرہ اور باقی جگہوں پر سفر کیا اور لوگوں کو اپنے ساتھ ملانے لگا۔ اس نے حضرت علیؓ کے لئے ایک پارٹی بھی قائم کی۔ وصی والے عقیدے کو نو مسلموں میں بہت مقبولیت ملی۔ جب اس عقیدے پر لوگ جمع ہو گئے تو اس کا مقصد ہی حضرت عثمانؓ کی خلافت کو(معاذاللہ) مشکوک قرار دینا تھا جس کے ذریعے ان سب کے دلوں میں حضرت عثمانؓ سے نفرت کا بیج لگ گیا۔ ساتھ ساتھ ابنِ سبا اور اس کے پیروکاروں نے ظاہری تقویٰ کو سختی اور پابندی سے اختیار کیا تا کہ یہ جدھر بھی جائیں لوگ ان کے معترف ہو جائیں کہ یہ تو نیک و پرہیزگار لوگ ہیں۔ یہ انسانی فطرت بھی ہے کہ انسان جس کو ظاہری طور پر اچھے اعمال کرتے دیکھتا ہے اس کی بات جلد مان لیتا ہے کہ وہ غلط نہیں ہو سکتا۔ 

یہ سمجھ لینا چاہیے کہ سبائیوں کی سازش بہت منظم تھی۔ آغازِ سازش میں عبداللہ بن سبا نے جب عرب و عجم کے طول و عرض میں دورے کئے تو جرائم پیشہ افراد سے ملا اور جرائم پیشہ بھی وہ جو سزا یافتہ تھے، جن کے اندر پہلے ہی حضرت عثمانؓ کے مقرر کردہ گورنروں کے خلاف نفرت تھی۔ اس نے ان جرائم پیشہ افراد کو گورنروں کے خلاف ابھارا کہ اگر حضرت عثمانؓ کو مجبور کر کے ان کو تبدیل کروایا جائے تو سب ٹھیک ہو جائے گا۔ اس طرح جرائم پیشہ افراد کی بہت بڑی تعداد اس کے ساتھ جمع ہو گئی۔ ساتھ ہی ساتھ اس نے حضرت علیؓ پر بہتان لگایا کہ حضرت علیؓ بھی چاہتے ہیں کہ ان سب گورنروں کے خلاف ہر صورت کھڑا ہونا چاہیے۔ سلطان العاشقین حضرت سخی سلطان محمد نجیب الرحمن مدظلہ الاقدس اپنی تصنیفِ مبارکہ میں رقمطراز ہیں:
اسلام کا سب سے بڑا دشمن ایک منافق عبداللہ بن سبا تھا جو درحقیقت یہودی تھا، لیکن اپنے آپ کو مسلمان ظاہر کرتاتھا۔ ابنِ سبا بہت چالاک اور سازشی تھا۔ اس نے حضرت عثمانؓ اور بنو اُمیہ کے خلاف پروپیگنڈا کیا اور بنی ہاشم کو خلافت کا حقدار قرار دیا۔ بعض مسلمانوں کو یہ کہہ کر بھڑکایا کہ رسول اللہ صلی اللہ علیہ وآلہٖ وسلم حضرت مسیح علیہ السلام کی طرح دوبارہ اس دنیا میں تشریف لائیں گے۔ (خلفائے راشدین)

۱۳۔ سازشوں اور فتنے کی سنگینی کا اندازہ اس امر سے بھی لگایا جا سکتا ہے کہ حضرت عائشہؓ چاہتی تھیں کہ وہ حج پر جانے سے پہلے حضرت عثمانؓ کے حالات بہتر کرنے میں کردار ادا کریں لیکن جب ان کو اندازہ ہوا کہ یہ سب جو حضرت عثمانؓ کے خلاف جمع ہو چکے ہیں نہ حضرت عثمانؓ کو چھوڑیں گے اور نہ کسی اور کو جو اِن کے راستے میں آئے گا تو آپؓ نے حج کے لئے روانہ ہونا ہی بہتر سمجھا۔ اس سلسلہ میں ابنِ کثیر لکھتے ہیں:
اُمّ المومنین حضرت عائشہ صدیقہؓ اس سال حج کے لئے نکلیں، آپؓ سے عرض کیا گیا کہ اگر آپؓ ٹھہرتیں تو زیادہ مناسب تھا، شاید یہ لوگ آپؓ سے ڈر جاتے۔ آپؓ نے فرمایا:میں اپنی رائے ان کے بارے میں ظاہر کروں تو مجھے اندیشہ ہے کہ مجھے بھی وہی اذیت اٹھانی پڑے گی جو اُمِ حبیبہؓ نے اٹھائی ہے۔ (تاریخ ابنِ کثیر) 

بہت سے جید صحابہؓ نے جب یہ صورتحال دیکھی تو گوشہ نشینی کو بہتر جانا۔ اس سلسلہ میں طبری لکھتے ہیں:
جب حضرت طلحہؓ اور حضرت زبیرؓ کو معلوم ہوا کہ حضرت علیؓ اور حضرت اُمِ حبیبہؓ کے ساتھ بدسلوکی کی گئی ہے تو وہ بھی خانہ نشین ہو گئے۔ (تاریخ طبری، جلد سوم، حصہ اول، ص442)

۱۴۔ اس سازش کے متعلق طبری لکھتے ہیں:
ابوعون مولیٰ مسور بن مخرمہ بیان کرتے ہیں اہلِ مصر حضرت عثمانؓ کو شہید کرنا اور جنگ کرنا نہیں چاہتے تھے مگر بصرہ اور کوفہ سے عراقی (باغی) آئے اور شام سے بھی امداد آئی تو انہوں نے ان کی حوصلہ افزائی کی۔ (تاریخ طبری، جلد سوم، حصہ اوّل، ص 451) 

(جاری ہے)

استفادہ کتب:
۱۔خلفائے راشدینؓ:  تصنیفِ لطیف سلطان العاشقین حضرت سخی سلطان محمد نجیب الرحمٰن مدظلہ الاقدس،  ناشر : سلطان الفقر پبلیکیشنز
۲۔ ازالتہ الخفا۔ شاہ ولی اللہ محدث دہلوی
۳۔ تاریخ طبری:  تصنیف علامہ ابی جعفر محمد بن جریر الطبری، ناشر نفیس اکیڈمی کراچی
۴۔ تاریخ ابنِ کثیر: تصنیف حافظ عمادالدین ابوالفدا اسماعیل، ناشر دارالاشاعت کراچی
۵۔ عثمانؓ ابنِ عفان، مصنف: محمد رضا مصری