اقبالؒ ۔ حقیقت کے مفسر Iqbal – Haqeeqat Kay Muaffsir

اس مقامِ وحدت تک رسائی کے لیے عشقِ رسول صلی اللہ علیہ وآلہٖ وسلم  ناگزیر ہے۔ جب صحابہ کرامؓ عشقِ رسول صلی اللہ علیہ وآلہٖ وسلم  میں ڈوب گئے تھے تو ان کے لیے ان کے پرانے رشتوں ناتوں کی کوئی اہمیت نہ رہ گئی تھی۔ ان کا ہر رشتہ حضور علیہ الصلوٰۃ والسلام کی ذات سے جڑ گیا تھا۔ رشتوں کی بیڑیوں سے آزاد ہو کر ہی انہوں نے دینِ الٰہی اور عشقِ رسول صلی اللہ علیہ وآلہٖ وسلم  کا حق ادا کیا۔
اقبال رحمتہ اللہ علیہ اس ضمن میں فرماتے ہیں:

عشق او سرمایہ جمعیت است
ہمچوں خون اندر عروق ملت است
عشق در جان و نسب در پیکر است
رشتہ عشق از نسب محکم تر است
عشق ورزی از نسب باید گذشت
ہم ز ایران و عرب باید گذشت

مفہوم:حضور علیہ الصلوٰۃ والسلام کا عشق ہمارے لیے یکجا رہنے کا سامان ہے۔ یہ عشق خون کی طرح ملت کی رگوں میں دوڑ رہا ہے۔ عشق جان میں اتر جاتا ہے اور نسب صرف جسم تک محدود رہتا ہے۔ اس سے ثابت ہوا کہ عشق کا رشتہ نسب کے رشتے سے زیادہ مضبوط ہے۔ اگر تو نے رسول اللہ صلی اللہ علیہ وآلہٖ وسلم  سے لو لگائی ہے تو نسب سے بے تعلق ہو جا بلکہ ایران و عرب سے بھی رشتہ توڑ لے۔ یعنی تمام مسلم اُمت ہر تعلق سے آزاد ہو کر ایک وحدت بن جائے۔

اُمت او مثل او نورِ حق است
ہستی ما از وجودش مشتق است
نورِ حق را کس نجوید زاد و بود
خلعت حق را چہ حاجت تار و پود
ہر کہ پا در بند اقلیم و جد است
بے  خبر  از  لم یلد و لم  یولد      است

مفہوم:رسول اللہ  صلی اللہ علیہ وآلہٖ وسلم  کی اُمت بھی اُن کی طرح اللہ کا نور ہے۔ ہماری ہستی حضور علیہ الصلوٰۃ والسلام کے نور سے ہی وجود میں آئی۔ اللہ کے نور کی اصل حقیقت کون ڈھونڈ سکتا ہے؟ جس لباس کا تعلق نورِ حق سے ہو اسے تانے بانے کی کیا ضرورت ہے۔ (یعنی جس قوم کی اصل حقیقت لطیف نورِ حق ہو اور وہ اسی نور سے منسلک ہو اسے ظاہری رشتے ناتوں کی کیا ضرورت ہے۔) جس شخص کے پاؤں ملک اور باپ دادا کے بندھنوں میں جکڑے ہوئے ہیں یقین کر لینا چاہیے کہ وہ  لم یلد و لم  یولد     کی حقیقت سے بالکل بے خبر ہے۔ یعنی سورۃ اخلاص کی اس آیت کا مطلب ہی یہ ہے کہ مسلمان نہ تو کسی جغرافیائی حد اور مملکت کا پابند ہے اور نہ ہی رنگ و نسب کا‘ جو مسلمان ان رشتوں میں جکڑا رہے گا وہ  لم یلد و لم  یولد     پر سچے ایمان کا مستحق نہیں سمجھا جاسکتا ہے۔

وَلَمْ  یَکُنْ  لَّہٗ  کُفُوًا اَحَدٌ (اور نہ ہی کوئی اس کے برابر ہے)

رشتہ   با   لم یکن     باید     قوی
تا تو در اقوام بے ہمتا شوی
آنکہ ذاتش واحد است و لاشریک
بندہ اش ہم در نسازد باشریک
مومن بالائے ہر بالا ترے
غیرت او بر نتابد ہمسرے
خرقہ  لا  تحزنوا  اندر    برش
انتم  الاعلون   تا جے بر سرش

مفہوم:اے مسلمان! تجھے خدا کی اس صفت سے رشتہ مستحکم کر لینا چاہیے جو  لم یکن لہ کفوًا احد  میں بیان ہوئی ہے۔ یعنی اس کے برابر کوئی نہیں۔ یہ رشتہ مستحکم ہو جائے گا تو توُ دنیا کی قوموں میں بے مثال بن جائے گا۔ وہ پاک ذات ہے جو اکیلا ہے اور کوئی اس کا شریک نہیں۔ اس کا بندہ بھی کوئی شریک گوارا نہیں کر سکتا۔ مومن ہر بلند تر سے بلند ہے۔ اس کی غیرت کسی ہمسر کو برداشت نہیں کر سکتی۔ وہ لاتحزنوا  کا خرقہ پہنے ہوتا ہے یعنی اسے کسی چیز کا غم نہیں ہوتا اور انتم الاعلون  یعنی ’’تم ہی سب سے سربلند ہو گے۔‘‘ کا تاج اس کے سر پر ہوتا ہے۔ (اشارہ سورۃ آل عمران کی اس آیت کی طرف ہے)
وَلَا تَھِنُوْا وَلَا تَحْزَنُوْا وَ اَنْتُمُ الْاَعْلَوْنَ اِنْ کُنْتُمْ  مُّؤْمِنِیْنَ۔ (سورۃ آلِ عمران۔139)
ترجمہ: اور نہ ہمت ہارو، نہ غمگین ہو، تم ہی سب سے سربلند ہو، بشرطیکہ تم سچے مومن ہو۔

می کشد بارِ دو عالم دوش او
بحر و بر پروردہ آغوش او
بر غوتندر مدام افگندہ گوش
برق اگر ریزد ہمی گیرد بدوش
پیش باطل تیغ و پیش حق سپر
امر و نہی او عیار خیر و شر
در گرہ صد شعلہ دارد اخگرش
زندگی گیرد کمال از جوہرش
در فضائے ایں جہان ہائے و ہو
نغمہ پیدا نیست جز تکبیر او
عفو و عدل و بذل و احسانش عظیم
ہم بقہر اندر مزاج او کریم

مفہوم: (مومن کا کوئی ہمسر نہیں کیونکہ) وہ دونوں جہانوں کا بوجھ اپنے کندھے پر اٹھا لیتا ہے۔ خشکی اور تری دونوں اس کی آغوش میں پلتی ہیں۔ بجلی کی کڑک کے شور پر اس کے کان لگے رہتے ہیں۔ اگر برق گرتی ہے تو اسے اپنے کندھے پر اٹھا لیتا ہے۔ باطل سے سامنا ہو جائے تو مومن تلوار بن جاتا ہے۔ حق کی حفاظت کا موقع آجائے تو وہ ڈھال کی شکل اختیار کر لیتا ہے۔ اسی کے امر و نہی، نیک و بد کی کسوٹی ہیں یعنی مومن جس چیز کا حکم دے وہ نیکی اور جس سے روکے‘ وہ بدی ہے۔ اس کے انگارے کی گرہ میں سینکڑوں شعلے ہیں اور زندگی کو اسی کے جوہر سے درجہ کمال حاصل ہوتا ہے۔ ہائے و ہو کے اس جہان کی فضا میں مومن کی تکبیر کے سوا کوئی نغمہ پیدا نہیں ہو سکتا۔ عفو و درگزر، عدل و انصاف اور سخاوت و احسان میں اس کا درجہ بہت اونچا ہے۔ غصے کی حالت میں بھی اس کے مزاج پر لطف و کرم ہی غالب رہتا ہے۔

سورۃ اخلاص کی اس تفسیر کے ذریعے اقبالؒ مسلم اُمت کو اتحاد کا سبق دینے کے ساتھ ساتھ انہیں مسلمان سے مومن کے مقام تک رسائی کے مراحل سے بھی آگاہ کر رہے ہیں۔ ایک مسلمان جب دنیا کی ہر شے سے بے نیازی اختیار کر کے، ہر رشتے سے تعلق توڑ کر ہر غیر ماسویٰ اللہ سے فارغ ہو جاتا ہے تو وہ دوئی اور کثرت سے نکل کر مقامِ وحدتِ حق تعالیٰ تک رسائی حاصل کر لیتا ہے۔ یہ وہ مقام ہے جہاں پہنچ کر وہ تمام مخلوق سے بلند تر مقام حاصل کر لیتا ہے‘ جہاں کوئی اس کی ہمسری اور برابری نہیں کر سکتا کیونکہ وہ مکمل طور پر صفاتِ الٰہیہ سے متصف ہو چکا ہوتا ہے اور ’’مومن‘‘ کہلانے کے لائق بن جاتا ہے۔ سورۃ اخلاص کی اس تفسیر کے ذریعے علامہ اقبال رحمتہ اللہ علیہ مسلمانوں کو مومن کے درجے تک رسائی کی ترغیب دے رہے ہیں۔ اللہ تعالیٰ مسلم امت کو اقبالؒ کے کلام سے ان کی خواہش کے مطابق استفادہ کرنے کی توفیق عطا فرمائے۔ آمین