مجلس ِمحمدیؐ Majlis e Mohammadi

جو شخص حضرت محمد رسو ل اللہ صلی اللہ علیہ وآلہٖ وسلم کی حضوری اختیار کر کے مقامِ شریعت میں حضرت محمد رسو ل اللہ صلی اللہ علیہ وآلہٖ وسلم کی مجلس میں داخل ہوتاہے اسے مقامِ طریقت میں مجلسِ محمدی صلی اللہ علیہ وآلہٖ وسلم کی حضوری سے مشرف ہونے کے احوال کی کیا خبر ؟ جو کوئی مقامِ طریقت میں حضوری سے مشرف ہو کر مجلسِ محمدی صلی اللہ علیہ وآلہٖ وسلم میں داخل ہوتا ہے اُسے مقامِ حقیقت میں مجلسِ محمدی صلی اللہ علیہ وآلہٖ وسلم کی حضوری کی کیا خبر؟جو مقامِ حقیقت پر مجلسِ محمدی صلی اللہ علیہ وآلہٖ وسلم کی حضوری سے مشرف ہو اُسے مقامِ معرفت کے حقائق و احوال کی کیا خبر؟ جو مقامِ معرفت پر مجلسِ محمدی صلی اللہ علیہ وآلہٖ وسلم کی حضوری سے مشرف ہو اُسے مقامِ عشق کی حضوری کی کیا خبر؟ جسے مقامِ عشق میں مجلسِ محمدی صلی اللہ علیہ وآلہٖ وسلم کی حضوری حاصل ہو اُسے مقامِ محبت کی حضوریات کی حقیقت کی کیا خبر؟ جو اللہ کے مدِنظر رہتا ہے دونوں جہان اُس کے مدِنظر رہتے ہیں۔ جسے مقامِ محبت کی حضوری حاصل ہوتی ہے وہ فنا فی اللہ کی حضوری کی حقیقت کو کیا جانے؟ پس ہر کسی کو درجہ بدرجہ (اپنے مرتبہ کے لحاظ سے مجلسِ محمدی صلی اللہ علیہ وآلہٖ وسلم میں) عزت و مقام حاصل ہے مگر فقیر فنا فی اللہ مجلسِ محمدی صلی اللہ علیہ وآلہٖ وسلم کے تمام مراتب کو اور ان مراتب کی حضوری رکھنے والوں کو جانتا پہچانتا ہے۔ (عین الفقر)

مجلسِ محمدیؐ کی حضوری کے لیے مرشد کا کردار

کیا راہِ حق کے سالک اور طالبانِ مولیٰ کثرتِ مطالعہ سے یا کثرت کے ساتھ زہد و ریاضت اور ورد وظائف کرنے سے یا عباداتِ ظاہری سے مجلسِ محمدی صلی اللہ علیہ وآلہٖ وسلم کی حضوری سے مشرف ہو سکتے ہیں؟

بذریعہ علم طالب کبھی بھی کسی بھی روحانی مقام و مرتبہ پر نہیں پہنچ سکتے نہ ہی ان مراتب کا حقیقی ادراک کر سکتے ہیں بلکہ مرشد کامل اکمل کی صحبت کے بغیر زیادہ علم پڑھنے سے طالب گمراہ ہو جاتے ہیں۔ ان کے اندر کثرتِ علم پر تکبر پیدا ہو جاتا ہے۔ حضور علیہ الصلوٰۃ والسلام نے ارشاد فرمایا:
اَلْعِلْمُ حِجَابُ الْاَکْبَر 
ترجمہ: علم حجابِ اکبر ہے۔

راہِ سلوک کا سفر تو نفس کے حجاب کو ختم کرنے سے طے ہوتا ہے جبکہ کثرتِ مطالعہ سے نفس کا حجاب مزید موٹا ہو جاتا ہے۔ طالب بجائے اللہ کے قریب ہونے کے اس سے مزید دور ہو جاتا ہے۔ البتہ مرشد کی صحبت میں نفس کے تزکیہ کے ساتھ ساتھ صادق طالبانِ مولیٰ کے قلب پر علمِ حضوری یا علمِ لدنیّ منکشف کیا جاتا ہے جس کی بدولت وہ نہ صرف اسرارِ الٰہی سے بہرہ ور ہوتے ہیں بلکہ اللہ تعالیٰ کی معرفت اور اس کا قرب و وصال بھی پاتے ہیں۔ حضرت سخی سلطان باھوُ رحمتہ اللہ علیہ فرماتے ہیں:
جان لو کہ فقہ و مسائل اور عربی کا علم سیکھنے اور ظاہری ریاضت و طاعت سے نفس کافی موٹا ہو جاتا ہے اور مخلوق میں شہرت اور نام و ناموس پا کر بہت خوش ہوتا ہے جس کے باعث اس میں انانیت پیدا ہو جاتی ہے اور وہ خود کو مخلوق کی نظر میں مزید نیک اور آراستہ ظاہر کرتاہے جبکہ تصوف، توحید، معرفتِ الٰہی اور وحدانیت کا علم پڑھنے سے نفس شرمندہ ہوتا ہے، ذکرِخفی کی بدولت گویا وہ اپنا گوشت خود کھاتا ہے اور اللہ تعالیٰ کے خوف کے باعث اس قدر آہ و زاری کرتا ہے کہ ہڈیوں سے مغز نکل آتا ہے۔ ایسی پوشیدہ اور بے ریا ریاضت کے ذریعے وہ ہمیشہ خونِ جگر پیتا ہے جس کے باعث نفس کمزور ہو کر خواہشاتِ نفس سے پاک ہو جاتا ہے اور نیست و نابود ہو کر فنا فی اللہ ہو جاتا ہے۔ یہ علمِ تصوف ہے جسے سیکھنا فرضِ عین اور انبیا کی سنت ہے، اسی کی بدولت انسان مراتبِ اولیا پر پہنچتا اور مجلسِ محمدیؐ میں داخل ہوتا ہے۔ اگر کوئی فقیہ اور عالم جنہوں نے تمام علوم حاصل کیے ہوں اور وہ ان علوم کو تمام عمر پڑھتے رہیں تو بھی دل سے سیاہی، زنگار، کدورت، حبِ دنیا اور خطرات دور نہیں ہوتے جب تک کہ قلب کو صاف کرنے والا علمِ تصوف نہ پڑھا جائے۔ (کلید التوحید کلاں)

ظاہری عبادات اور ورد وظائف کے ذریعے بھی طالب کبھی مجلسِ محمدی صلی اللہ علیہ وآلہٖ وسلم کی حضوری سے مشرف نہیں ہو سکتا خواہ دن رات عبادات کرتا رہے یا تسبیحات پڑھتا رہے سوائے مرشد کامل اکمل کی صحبت، تربیت اور نگاہِ کامل کے۔ حضرت سخی سلطان باھوُ رحمتہ اللہ علیہ پنجابی ابیات میں فرماتے ہیں:

باجھوں مرشد کجھ نہ حاصل، توڑے راتیں جاگ پڑھیوے ھوُ

جہاں تک زہد و ریاضت کی بات ہے تو مرشد کامل اکمل کی ظاہری و باطنی نگرانی کے بغیر زہد و ریاضت کرنا انسان کو گمراہی کی طرف لے جاتا ہے۔ حضرت سخی سلطان باھوُ رحمتہ اللہ علیہ پنجابی ابیات میں فرماتے ہیں:

مرشد باجھوں فقر کماوے، وچ کفر دے بڈے ھوُ

طالبِ مولیٰ ظاہری ورد وظائف اور اعمالِ ظاہر سے ہرگز باطن میں مجلسِ محمدی صلی اللہ علیہ وآلہٖ وسلم تک نہیں پہنچ سکتا اگرچہ تمام عمر ریاضت کی خاطر پتھر سے سر ٹکراتا رہے کیونکہ راہِ باطن صاحبِ باطن مرشد کامل سے حاصل ہوتی ہے جس کے ذریعے طالب ایک لمحہ میں مجلسِ محمدی صلی اللہ علیہ وآلہٖ وسلم کی حضوری میں پہنچ سکتا ہے اور واصل بھی ہو سکتا ہے۔ (کلید التوحید کلاں)

بہت سے لوگ جو کثرت کے ساتھ عبادت کرتے ہیں اور خاص طور پر حضور علیہ الصلوٰۃ والسلام کی زیارت کے لیے وظائف کرتے ہیں وہ اکثر خواب میں حضور علیہ الصلوٰۃ والسلام کی زیارت سے مشرف ہو بھی جاتے ہیں لیکن حضور علیہ الصلوٰۃ والسلام کے چہرۂ مبارک پر بہت زیادہ نور ہونے کی وجہ سے چہرۂ مبارک کی زیارت نہیں کر پاتے محض آواز مبارک سن پاتے ہیں مجلسِ محمدی صلی اللہ علیہ وآلہٖ وسلم کی حضوری میں پہنچنا توبہت دور کی بات ہے۔ حضور علیہ الصلوٰۃ والسلام کے چہرۂ انور کی زیارت اور مجلسِ محمدی صلی اللہ علیہ وآلہٖ وسلم کی حضوری کے لیے تزکیۂ نفس کے مرحلہ سے گزرنا بہت زیادہ ضروری ہے۔ جس قدر نفس کا میل دور ہوگا، آئینہ قلب جتنا زیادہ روشن ہوگا اتنی ہی جلدی نہ صرف حضور علیہ الصلوٰۃ والسلام کی خواب میں زیارت ہوگی بلکہ ظاہری طور پر مجلسِ محمدی صلی اللہ علیہ وآلہٖ وسلم کی حضوری کا شرف بھی حاصل ہوگا۔

حضرت ابوہریرہ رضی اللہ عنہٗ سے روایت ہے کہ حضور علیہ الصلوٰۃ والسلام نے ارشاد فرمایا:’’جس نے مجھے خواب میں دیکھا وہ عنقریب مجھے بیداری میں بھی دیکھے گا۔‘‘ (مسلم5920)

 تزکیہ نفس کے لیے مرشد کامل اکمل کی صحبت اور تربیت بہت زیادہ ضروری ہے۔ صرف مرشد کامل اکمل جامع نور الہدیٰ فقیر کامل جو خود بھی مجلسِ محمدی صلی اللہ علیہ وآلہٖ وسلم کی حضوری سے مشرف ہوتا ہے وہی اس مجلس میں پہنچانے کے لیے طالب کی تربیت کر سکتا ہے۔ حضرت سخی سلطان باھوُ رحمتہ اللہ علیہ فرماتے ہیں:
جان لو کہ مرد مرشد وہ ہے جو بغیر ذکر و فکر اور بنا ریاضت و مشقت تصور اسمِ اللہ ذات کے ذریعے مجلسِ محمدی صلی اللہ علیہ وآلہٖ وسلم کی حضوری میں لے جائے۔ اس میں شک نہ کر کیونکہ جو شک کرتا ہے کافر ہو جاتا ہے۔۔۔ جو مرشد خود صاحبِ حضور ہواس کے لیے اپنے طالبوں کو بھی حضوری میں پہنچانا کیا مشکل اور بعید ہے! (محبت الاسرار)

معرفتِ الٰہی، وصال اور مجلسِ محمدی صلی اللہ علیہ وآلہٖ وسلم کے جمال تک مرشد کامل کے بغیر پہنچنا محال ہے کیونکہ وہ پلک جھپکنے میں یہاں تک پہنچا سکتا ہے۔ (کلید التوحید کلاں) 

جو ایک ہی بار میں نفسِ امارہ سے تعلق ختم نہیں کرتا وہ ہرگز قلبِ سلیم اور رضائے حق کو تسلیم کرنے کے مراتب حاصل نہیں کر سکتا اور نہ ہی مجلسِ محمدی صلی اللہ علیہ وآلہٖ وسلم سے مشرف ہو سکتا ہے۔ مرشد کامل روزِ اوّل طالب کو یہ سبق دیتا ہے کہ نفس اور اس کی خواہشات کو ختم کرو تاکہ انبیا و اولیا کی مجلس میں ہر ایک سے ملاقات کر سکو۔ (کلید التوحید کلاں)

جس طرح استاد کے بغیر شاگرد علم ِقرآن کا محرم اور واقف نہیں ہو سکتا اسی طرح مرشد ہادی و باطنی رہبر کے بغیر طالب معرفتِ الٰہی حاصل نہیں کر سکتا نہ ہی مجلسِ محمدی صلی اللہ علیہ وآلہٖ وسلم کی حضوری سے مشرف ہو سکتا ہے۔ (کلید التوحید کلاں)

جو لوگ مرشد کامل اکمل کی صحبت سے مستفید نہیں ہوتے یا مرشد کامل اکمل کی ضرورت اور اہمیت کا انکار کرتے ہیں وہ کبھی بھی حضور علیہ الصلوٰۃ والسلام کی مجلس میں آپؐ کے دیدار اور صحبت سے مستفید نہیں ہو سکتے۔ نہ ہی ان کا تزکیہ ہو سکتا ہے اور نہ ہی ان کے قلوب عشقِ حقیقی کے نور سے منور ہو سکتے ہیں۔ اس دنیا میں وہ بصیرت سے محروم رہتے ہیں۔ ان کے قلوب اللہ کی معرفت سے ناآشنا اور اس کی ذات سے غافل ہوتے ہیں۔ جبکہ جو طالب مجلسِ محمدیؐ کی حضوری کی طلب لیے اور عشقِ مصطفیؐ سے سرشار مرشد کامل اکمل کے دامن سے وابستہ ہو جاتے ہیں وہی مجلسِ محمدی صلی اللہ علیہ وآلہٖ وسلم کی حضوری سے مشرف ہوتے ہیں کیونکہ مرشد کامل اکمل پہلے ہی روز طالب کو مجلسِ محمدی صلی اللہ علیہ وآلہٖ وسلم کی حضوری سے مشرف کر سکتا ہے۔ حضرت سخی سلطان باھوُ رحمتہ اللہ علیہ فرماتے ہیں:
مرشد کامل وہ ہے جو معرفتِ  اِلَّا اللّٰہُ  اور مجلسِ محمدی صلی اللہ علیہ وآلہٖ وسلم کی حضوری کے علاوہ کوئی دوسرا سلک سلوک نہیں جانتا اور طالب صادق وہ ہے جو مرشد سے معرفتِ  اِلَّا اللّٰہُ   اور مجلس ِمحمدی صلی اللہ علیہ وآلہٖ وسلم کی حضوری کے علاوہ کچھ طلب نہیں کرتا۔ (کلید التوحید کلاں)

(جاری ہے)

استفادہ کتب:
۱۔ کلید التوحید کلاں۔ تصنیف لطیف سلطان العارفین حضرت سخی سلطان باھوؒ
۲۔ عین الفقر۔ ایضاً
۳۔ شمس العارفین۔ ایضاً
۴۔ محبت الاسرار۔ ایضاً