فضول گوئی کے نقصانات Fuzuul Goii Kay Nuqsanaat

 سلطان العارفین حضرت سخی سلطان باھوؒ کا فرمان مبارک ہے:
 بہت زیادہ بولنااور بے معنی کلام رجعت کا پیش خیمہ ہے۔ ناقص کے پاس نہ معرفت کی حکمت ہے اور نہ حکمِ حضوری اور قربِ الٰہی۔  (قربِ دیدار)

فرمانِ باھوُ رحمتہ اللہ علیہ ہے:

ہر کہ گوید غیر او شد خر آواز
خاموشی خلوت خانہ شد حق براز

ترجمہ: جو شخص غیر اللہ کے بارے میں گفتگو کرتا ہے اس کی آواز گدھے کی مثل ہے۔ تنہائی کے گوشے میں لب بستہ ہونا اللہ کے ساتھ راز داری ہے۔

سر ز تن گردد جدا سخنش مگو
عارفان ہمسخن باحق گفتگو

ترجمہ: عارفوں کا سر تن سے جدا بھی کر دیا جائے تب بھی وہ غیر اللہ کے بارے میں گفتگو نہیں کرتے۔ وہ حق تعالیٰ کے ساتھ ہم سخن رہتے ہیں اور اسی کے متعلق گفتگو کرتے ہیں۔ (قربِ دیدار)
لہٰذا بہترہے کہ اگر ظاہر و باطن میں گفتگو ہو توصرف اور صرف اللہ کے بارے میں ورنہ مکمل خاموشی اختیار کی جائے۔ 

حضرت علی کرم اللہ وجہہ فرماتے ہیں:
کتنے ہی لوگ ایسے ہیں جو اپنی زبان کی وجہ سے ہلاک ہو جاتے ہیں۔

جو شخص بلاوجہ بولتا اور بحث کرتا ہے ،کثرتِ کلام کی وجہ سے بعض اوقات اس کے منہ سے ایسی باتیں نکل جاتی ہیں جو اس کو اللہ کے سامنے گنہگار اور مخلوق کے سامنے بے عزت کرواتی ہیں۔

حضرت شیخ سعدیؒ ایک درویش کا قصّہ بیان کرتے ہیں جو خاموش رہتا تھا۔ لوگ اس کی خاموشی کی بدولت اسے درویش جانتے تھے ۔ پھر اس نے غرور کیا اور لوگوں کے ہجوم کو اپنا کمال جانا۔ پھر جب اس نے چپ کا روزہ توڑا اور گفتگو کی تو لوگوں نے اس کی گفتگو سے اندازہ لگایا کہ یہ جاہل ہے اور اگر وہ واقعی درویش ہوتا تو یقینا حکمت و دانائی کی باتیں کرتا اور لوگوں کے اس ہجوم کو اپنا کمال جاننے کی بجائے اللہ تعالیٰ کی عطا جانتا۔

پس خاموش رہنا تمام بھلائیوں کی جڑ ہے اور داناؤں کا قول ہے:
جو شخص کم سوتا،کم کھاتا اور کم بولتا ہے وہ بیشمار برائیوں سے محفوظ رہتا ہے۔
خاموشی ایک ایسی شے ہے جو تیری جہالت کو چھپاتی ہے۔ (حکایاتِ سعدیؒ)

خاموشی کی اقسام

حضرت سخی سلطان باھوؒ فرماتے ہیں:
خاموشی مختلف قسم کی ہوتی ہے بعض مردہ دل والوں کی خاموشی مکرو فریب اور تقلید کی غرض سے ہوتی ہے اور بعض کی خاموشی  معرفت اِلَّا اللّٰہ اور توحید کی بدولت ہوتی ہے۔ (کلید التوحید کلاں)

آپؒ مزید فرماتے ہیں:
 خاموشی کی چار قسمیں ہیں:پہلی قسم کی خاموشی اہلِ دنیا، متکبر اور ظالم لوگوں کی ہے جو تکبر اور نفسانی خواہشات کی وجہ سے غریب، عاجز، مظلوم، مسکین اور فقیروں سے ہمکلام نہیں ہوتے۔ خاموشی کی دوسری قسم وہ لوگ اختیار کرتے ہیں جن کا مقصد اپنے عیبوں کو چھپانا ہوتا ہے۔ وہ خاموشی کی آڑ میں خود فروشی اور دکانداری کرتے ہیں۔ ایسے دکاندار ظاہر میں جمعیت سے آراستہ نظر آتے ہیں لیکن ان کا باطن معرفت سے محروم اور پریشان حال ہوتا ہے۔ ان کی درویشی سراسر مکر و فریب ہوتی ہے۔ جان لو کہ ان کی خاموشی، حلیمی، سلیمی اور علم درحقیقت لوگوں کو پھانسنے کا جال ہے اور ازروئے تکبر ہوتی ہے۔ تیسری قسم کی خاموشی ان لوگوں کی ہے جن کا قلب تفکر، ذکر، فکر، مراقبہ اور اللہ کی جانب متوجہ رہنے سے زندہ ہو جاتا ہے۔ یہ وہ قلب ہے جو اللہ سے پیوست ہے وہ اپنے قلب سے الہام اور روزِ الست کے کن فیکون کے پیغام حاصل کرتے ہیں ان کی خاموشی اس وجہ سے ہے کہ ان کی آنکھیں عین العیان دیدار میں مست ہیں اور وہ قربِ رحمن میں جڑے ہوتے ہیں۔ چہارم خاموشی ان لوگوں کی ہے جن کی جان بے حجاب دیدار کی وجہ سے کباب ہو گئی ہے اور وہ خونِ جگر پیتے ہیں۔ یہ لوگ نفس، دنیا اور شیطان کو فراموش کر کے معرفتِ الٰہیہ میں محو رہتے ہیں۔ جو طالب توحیدِالٰہی میں غرق اور نورِ ذات کے دیدار سے مشرف ہوتا ہے اس کے لیے اس طرح کی خاموشی فرضِ عین ہے اور اس کی یہ خاموشی اللہ کے ساتھ خلوت ہوتی ہے۔ بہت زیادہ بولنا اور بے معنی کلام رجعت کا پیش خیمہ ہے۔ (قربِ دیدار)

ظاہری خاموشی کی ایک قسم ایسی بھی ہے جو کہ بظاہر تو اتنی خطرناک نہیں لیکن باطنی ترقی کی راہ میں رکاوٹ بن جاتی ہے۔ طالب بظاہر خاموش ہے، باطن میں بھی نہ تو مرشد پاک کے خلاف ہے اور نہ ہی مغرور ہے لیکن اس کی سوچوں کا رُخ مسلسل دنیا اور دنیاوی معاملات کی طرف ہے۔ اگر باطن میں اللہ سے گفتگو کر بھی رہا ہے تو صرف دنیاوی معاملات کے متعلق اور دنیا کے گلے شکوے چل رہے ہیں یا پھر دنیاوی خواہشات کاذکر۔ ایسی خاموشی سے بچنا بھی نہایت ضروری ہے۔

انسان کی زندگی میں کچھ مقامات ایسے بھی آتے ہیں جہاں خاموشی اختیار کرنا گناہِ عظیم بن جاتا ہے جیسا کہ کسی محفل میں ناحق بات کی جا رہی ہو یا شریعت کی خلاف ورزی ہو تو ایسے موقعوں پر حق بات نہ کہنا غلط ہو گا۔ جیسا کہ حدیثِ مبارکہ ہے:
جو حق بات کہنے سے رُکا وہ گونگا شیطان ہے۔

حضرت بایزید بسطامیؒ فرماتے ہیں :
راہِ طریقت پر چلنے والے سالک کو چاہیے کہ بے ضرورت گھر سے نہ نکلے اور بلاوجہ لوگوں میں نشست و برخاست نہ رکھے۔ ہاں مجلسِ اولیا میں جائے مگر وہاں بھی فضول گفتگو نہ کرے۔ پھر دیکھیے کہ اس کی عبادت کیا رنگ لاتی ہے اور اس کا ضمیر کس قدر روشن و منوّر ہو جاتا ہے۔

فقر کا تعلق اللہ اور انسان کے باطنی رشتے سے ہے۔ اس تعلق کو مضبوط کر نے کے لیے فضول گوئی سے بچنا اور سکوت اختیار کرنا لازم ہے۔ لیکن اس کے ساتھ ساتھ سکوت اختیار کرنا اس لیے بھی ضروری ہے تاکہ انسان بے جا گفتگو کی وجہ سے جن اخلاقی و باطنی بیماریوں کا شکار ہو جاتا ہے ان سے بچا جائے مثلاً جھوٹ، غیبت، چغلی، گلہ گوئی اور بہتان وغیرہ۔ یہ تمام بیماریاں باطنی سفر میں رکاوٹ کا باعث بنتی ہیں۔

ایک انسان جب تک ظاہری خاموشی اختیار نہیں کر لیتا اس وقت تک سانسوں کے ساتھ ذکرِاسمِ اللہ ذات (ذکرِ پاس انفاس) نہیں کر سکتا اور نہ ہی اپنی ذات کے اندر غور و فکر کر سکتا ہے۔ جس کے نتیجے میں معرفتِ الٰہی حاصل کرنے میں ناکام ہو جاتا ہے۔ مرشد کامل اکمل سلطان العاشقین حضرت سخی سلطان محمد نجیب الرحمٰن مدظلہ الاقدس فرماتے ہیں:
 اللہ کی ذات انسان میں بیج کی مانند ہے۔ یہ بیج اسمِ اللہ ذات کے پانی سے پھلتا پھولتا ہے۔ (سلطان العاشقین)

پس جو یہ چاہے کہ ذاتِ باری تعالیٰ کا مشاہدہ اپنے باطن میں کرے اسے چاہیے کہ اسمِ اللہ ذات کا ذاکر بن جائے اور اس کے لیے خاموشی اختیار کرے۔ کیونکہ جتنا پانی دیں گے پودا اتنا ہی تناور ہوتا جائے گا۔

پس بہتر ہے کہ ظاہری زبان کوبند کیا جائے اور خاموشی و خلوت اختیار کی جائے تا کہ اسمِ اللہ ذات کا ذکر کر کے اپنے باطن کو آباد کرے اور جیسے ہی باطن آباد ہو یعنی ذاتِ باری تعالیٰ کا ظہور ہو اور باطن میں اللہ سے کلام کا آغاز ہو تو باطن میں بھی دنیاوی سوچوں سے پرہیز کرے اور مکمل سکوت اختیار کرے تا کہ اللہ تعالیٰ کی بات کو بہتر طریقے سے سمجھ سکے۔
حضرت طاؤس رحمتہ اللہ علیہ فرماتے ہیں: میری زبان ایک درندہ ہے اگر میں اسے کھلا چھوڑوں تو وہ مجھے کھا لے۔ (احیاء العلوم)
یونانی دانشور بقراط نے ایک شخص کو بہت زیادہ بولتے سنا تو کہا ’’اے فلاں! اللہ عزو جل نے انسان کے لیے زبان ایک اور کان دو بنائے ہیں تا کہ بولے کم اور سنے زیادہ۔‘‘
راہِ فقر میں خاموشی کو خاص اہمیت حاصل ہے بلکہ یہ بنیاد ہے کیونکہ خاموش رہنے سے ہی غوروفکر حاصل ہوتا ہے اور غورو فکر سے ہی مقصدِ حیات کو پایا جا سکتا ہے۔
خاموشی ایک ایسی عبادت ہے جس کو فرشتے لکھ نہیں سکتے، شیطان اسے بگاڑ نہیں سکتا اور اللہ تعالیٰ کے سوا اسے کوئی جان نہیں سکتا۔ خاموشی کو ہی اپنا شعار بنانا چاہیے تاکہ انسان شرِزبان سے محفوظ رہے کیونکہ اگر لوگ اپنی گفتگو سے غیبت، بہتان، تہمت اور جھوٹ وغیرہ نکال دیں تو باقی صرف خاموشی رہ جاتی ہے جو کہ بہترین عبادت ہے۔
سلامتی اسی میں ہے کہ اپنا منہ بند رکھو ۔جب تک مچھلی کا منہ بند رہتا ہے وہ کانٹے کی گرفت میں نہیں آتی۔ (افلاطون)
لہجہ لفظ کا ڈی این اے ہے جس سے نظر کا فتور، نیت کا کھوٹ اور دل کا چور پکڑا جاتا ہے۔ (مشتاق احمد یوسفی)

 حاصلِ کلام یہ ہے کہ ہر حالت اور ہر صورت خاموشی اختیار کرنا بہتر اور نجات کا ذریعہ ہے کیونکہ زبان کی آفتیں اَن گنت ہیں اور ان سے بچنا سخت مشکل ہے۔ لہٰذا اس زبان کو بند ہی رکھا جائے تو بہتر ہے۔دعا ہے کہ اللہ پاک ہمیں فضول گوئی سے بچنے اور زبان کی آفتوں سے محفوظ رہنے کی توفیق عطا فرمائے۔آمین

استفادہ کتب:
۱۔الفتح الربانی: تصنیف سیدّنا غوث الاعظم حضرت شیخ عبدالقادر جیلانیؓ
۲۔کلید التوحید کلاں: تصنیف سلطان العارفین حضرت سخی سلطان باھوؒ
۳۔قربِ دیدار: ایضاً
۴ ۔شمس الفقرا:  تصنیفِ لطیف سلطان العاشقین حضرت سخی سلطان محمد نجیب الرحمٰن مدظلہ الاقدس
۵ ۔سلطان العاشقین: ناشر سلطان الفقر پبلیکیشنز لاہور
۶۔منہاج العابدین: تصنیف امام غزالیؒ
۷۔ احیاء العلوم: ایضاً
۸۔ حکایاتِ سعدی: تصنیف مولانا محمد سعدیؒ