حضرت علی کرم اللہ وجہہ کے دورِخلافت کی مشکلات Hazrat Ali r.a kay Dor-e-Khilafat ki Mushkilat

قسط 17                                                  سلطان محمد عبداللہ اقبال سروری قادری

ہم سے ابوالیمان نے بیان کیا، کہا ہم کو شعیب نے خبر دی، ان سے زہری نے بیان کیا، کہا مجھ کو ابوسلمہ بن عبدالرحمٰن نے خبر دی اور ان سے ابوسعید خدری رضی اللہ عنہٗ نے بیان کیا کہ ہم رسول اللہ صلی اللہ علیہ وآلہٖ وسلم کی خدمت میں موجود تھے اور آپ صلی اللہ علیہ وآلہٖ وسلم (جنگِ حنین کا مال غنیمت) تقسیم فرما رہے تھے اتنے میں بنی تمیم کا ذوالخویصرہ نامی ایک شخص آیا اور کہنے لگا کہ یا رسول اللہ! انصاف سے کام لیجئے۔ یہ سن کر آنحضرت صلی اللہ علیہ وآلہٖ وسلم نے فرمایا:
’’افسوس! اگر میں ہی انصاف نہ کروں تو دنیا میں پھر کون انصاف کرے گا۔ اگر میں ظالم ہو جاؤں تب تو میری بھی تباہی اور بربادی ہو جائے۔‘‘ حضرت عمر رضی اللہ عنہٗ نے عرض کیا حضور! اس کے بارے میں مجھے اجازت دیں میں اس کی گردن مار دوں۔ آنحضرت صلی اللہ علیہ وآلہٖ وسلم نے فرمایا ’’اسے چھوڑ دو۔ اس کے جوڑ کے کچھ لوگ پیدا ہوں گے کہ تم اپنی نماز کو ان کی نماز کے مقابلے میں (بظاہر) حقیر سمجھو گے اور تم اپنے روزوں کو ان کے روزوں کے مقابل ناچیز سمجھو گے۔ وہ قرآن کی تلاوت کریں گے لیکن وہ ان کے حلق کے نیچے نہیں اترے گا۔یہ لوگ دین سے اس طرح نکل جائیں گے جیسے زور دار تیر جانور سے پار ہو جاتا ہے۔ اس تیر کے پھل کو اگر دیکھا جائے تو اس میں کوئی چیز (خون وغیرہ) نظر نہ آئے گی پھر اس کے پٹھے کو اگر دیکھا جائے (تو چھڑ میں اس کے پھل کے داخل ہونے کی جگہ سے اوپر جو لگایا جاتا ہے) تو وہاں بھی کچھ نہ ملے گا۔ اس کے نفی (نفی تیر میں لگائی جانے والی لکڑی کو کہتے ہیں) کو دیکھا جائے تو وہاں بھی کچھ نشان نہیں ملے گا۔ اسی طرح اگر اس کے پر کو دیکھا جائے تو اس میں بھی کچھ نہیں ملے گا۔ حالانکہ گندگی اور خون سے وہ تیر گزرا ہے۔ ان کی علامت ایک کالا شخص ہو گا۔ اس کا ایک بازو عورت کے پستان کی طرح (اٹھا ہوا) ہو گا یا گوشت کے لوتھڑے کی طرح ہو گا اور حرکت کر رہا ہو گا۔ یہ لوگ مسلمانوں کے بہترین گروہ سے بغاوت کریں گے۔‘‘

 حضرت ابوسعید رضی اللہ عنہٗ نے کہا کہ میں گواہی دیتا ہوں کہ میں نے یہ حدیث رسول اللہ صلی اللہ علیہ وآلہٖ وسلم سے سنی تھی اور میں گواہی دیتا ہوں کہ حضرت علی بن ابی طالب کرم اللہ وجہہ نے ان سے جنگ کی تھی (یعنی خوارج سے) اس وقت میں بھی حضرت علی کرم اللہ وجہہ کے ساتھ تھا اور انہوں نے اس شخص کو تلاش کرایا (جسے آنحضرت صلی اللہ علیہ وآلہٖ وسلم نے اس گروہ کی علامت کے طور پر بتلایا تھا) آخر وہ لایا گیا۔ میں نے اسے دیکھا تو اس کا پورا حلیہ بالکل آنحضرت صلی اللہ علیہ وآلہٖ وسلم کے بیان کئے ہوئے اوصاف کے مطابق تھا۔ (بخاری 3610)

سلمہ بن کہیل نے کہا: مجھے زید بن وہب جہنی نے حدیث سنائی کہ وہ اس لشکر میں شامل تھے جو حضرت علی کرم اللہ وجہہ کے ساتھ تھا اور خوارج کی طرف روانہ ہوا تھا تو حضرت علی کرم اللہ وجہہ نے کہا: لوگو! میں نے رسول اللہ صلی اللہ علیہ وآلہٖ وسلم کو فرماتے ہوئے سنا ’’میری امت سے کچھ لوگ نکلیں گے، وہ (اس طرح) قرآن پڑھیں گے کہ تمہاری قرأت ان کی قرأت کے مقابلے میں کچھ نہ ہو گی اور نہ تمہاری نمازوں کی ان کی نمازوں کے مقابلے میں کوئی حیثیت ہو گی اور نہ ہی تمہارے روزوں کی ان کے روزوں کے مقابلے میں کوئی حیثیت ہو گی۔ وہ قرآن پڑھیں گے اور خیال کریں گے وہ ان کے حق میں ہے حالانکہ وہ ان کے خلاف ہوگا۔ ان کی نماز ان کی ہنسلیوں سے آگے نہیں بڑھے گی، وہ اس طرح تیز رفتاری کے ساتھ اسلام سے نکل جائیں گے جس طرح تیر بہت تیزی سے شکار کے اندر سے نکل جاتا ہے۔‘‘ اگر وہ لشکر، جو ان کو جا لے گا، جان لے کہ ان کے نبیؐ کی زبان سے ان کے بارے میں کیا فیصلہ ہوا ہے تو وہ عمل سے (بے نیاز ہو کر صرف اسی عمل پر) بھروسا کر لیں۔ اس (گروہ) کی نشانی یہ ہے کہ ان میں ایک آدمی ہو گا جس کا عضد (بازو، کندھے سے لے کر کہنی تک کا حصہ) ہو گا، کلائی نہیں ہو گی، اس کے بازو کے سرے پر پستان کی نوک کی طرح (کا نشان) ہو گا جس پر سفید بال ہوں گے۔ تم لوگ معاویہؓ اور اہلِ شام کی طرف جا رہے ہو اور ان (لوگوں) کو چھوڑ رہے ہو جو تمہارے بعد تمہارے بچوں اور اموال پر آ پڑیں گے، اللہ کی قسم! مجھے امید ہے کہ یہ وہی قوم ہے کیونکہ انہوں نے (مسلمانوں کا) حرمت والا خون بہایا ہے اور لوگوں کے مویشیوں پر غارت گری کی ہے۔ اللہ کا نام لے کر (ان کی طرف) چلو۔

سلمہ بن کہیل نے کہا: مجھے زید بن وہب نے (ایک ایک) منزل میں اتارا (ہر منزل کے بارے میں تفصیل سے بتایا) حتیٰ کہ بتایا: ہم ایک پل پر سے گزرے، پھر جب ہمارا آمنا سامنا ہوا تو اس روز خوارج کا سپہ سالار عبداللہ بن وہب راسبی تھا۔ اس نے ان سے کہا: اپنے نیزے پھینک دو اور اپنی تلواریں نیاموں سے نکال لو کیونکہ مجھے خطرہ ہے کہ وہ تمہارے سامنے (صلح کے لیے اللہ کا نام) پکاریں گے جس طرح انہوں نے حروراء کے دن تمہارے سامنے پکارا تھا۔ تو انہوں نے لوٹ کر اپنے نیزے دور پھینک دیے اور تلواریں سونت لیں تو لوگ انہی نیزوں کے ساتھ ان پر پل پڑے اور وہ ایک دوسرے پر قتل ہوئے (ایک کے بعد دوسرا آتا اور قتل ہو کر پہلوں پر گرتا) اور اس روز (علی کرم اللہ وجہہ کا ساتھ دینے والے) لوگوں میں سے دو کے سوا کوئی اور قتل نہ ہوا۔ حضرت علی کرم اللہ وجہہ نے کہا: ان میں ادھورے ہاتھ والے کو تلاش کرو۔ لوگوں نے بہت ڈھونڈا لیکن اس کو نہ پا سکے۔ اس پر حضرت علی کرم اللہ وجہہ خود اٹھے اور ان لوگوں کے پاس آئے جو قتل ہو کر ایک دوسرے پر گرے ہوئے تھے۔ آپ نے فرمایا: ان کو ہٹاؤ۔ تو انہوں نے اسے (لاشوں کے نیچے) زمین سے لگا ہوا پایا۔ آپ نے اللہ اکبر کہا۔ پھر کہا: اللہ نے سچ فرمایا اور اس کے رسول نے (اسی طرح ہم تک) پہنچا دیا۔ (زید بن وہب نے) کہا: عبیدہ سلمانی کھڑے ہو کر آپ کے سامنے حاضر ہوئے اور کہا: اے امیرالمومنین! اس اللہ کی قسم جس کے سوا کوئی عبادت کے لائق نہیں! آپ نے واقعی یہ حدیث رسول اللہ صلی اللہ علیہ وآلہٖ وسلم سے سنی تھی؟ تو انہوں نے کہا: ہاں! اس اللہ کی قسم جس کے سوا کوئی معبود نہیں! حتیٰ کہ اس نے آپ سے تین دفعہ قسم لی اور آپ اس کے سامنے حلف اٹھاتے رہے۔ (مسلم 2467)

حضرت ابوسعیدخدریؓ سے روایت ہے کہ رسول اللہ صلی اللہ علیہ والہ وسلم نے فرمایا کہ میری امت دو فرقوں میں بٹ جائے گی۔ اس کے درمیان سے ایک خارجی گروہ نکلے گا۔ ان کے قتل پر وہ گروہ متصرف ہو گا جو دونوں میں بہتر ہو گا۔ (خصائصِ علیؓ)

کہا جاتا ہے کہ اس جنگ میں حضرت علی کرم اللہ وجہہ کے صرف 7 لوگ شہید ہوئے۔ اس کے بعد حضرت علی کرم اللہ وجہہ نے شام کی طرف کوچ کرنے کا حکم دیا لیکن لوگ بہانے بنانے لگے کہ ایک دفعہ واپس کوفہ چلیں تا کہ زخمیوں کی مرہم پٹی کی جائے اور مزید لوگوں کو جہاد کے لیے دعوت دی جائے۔ حضرت علی کرم اللہ وجہہ لشکر کو کوفہ کی طرف لے گئے۔ ایک کھلے میدان میں قیام کیا۔ آپؓ نے لوگوں کو منع کیا کہ اپنی بیوی اور بچوں کے پاس کم سے کم جائیں لیکن آہستہ آہستہ لوگ بہت جانا شروع ہو گئے۔ یہاں تک کہ چند مخلص لوگوں کے علاوہ سب حضرت علی کرم اللہ وجہہ کو چھوڑ گئے۔ حضرت علیؓ نے پھر خطبہ دیا۔ طبریؒ لکھتے ہیں:
حضرت علی کرم اللہ وجہہ نے فرمایا ’’تمہیں کیا ہو گیا ہے کہ جب بھی تمہیں جہاد کے لیے چلنے کا حکم دیا جاتا ہے تو تم زمین سے چمٹ کر رہ جاتے ہو، کیا تم نے آخرت کے مقابلہ میں دنیاوی زندگی کو پسند کر لیا ہے؟ کیا تمہیں عزت کے مقابلے میں ذلت و خواری زیادہ محبوب ہے؟ یہ کیا بات ہے کہ جب بھی میں تمہیں جنگ کی دعوت دیتا ہوں تو تمہاری آنکھیں اس طرح پتھرا جاتی ہیں جیسے ان پر موت کا نشہ طاری ہو گیا ہو۔ گویا تمہاری عقل سلب کر لی گئی ہو۔ اب تم ذرّہ برابر بھی عقل نہیں رکھتے گویا تمہاری آنکھیں بند ہو چکی ہیں جس کے باعث تم دیکھ نہیں سکتے۔ واللہ کچھ تو بتاؤ تمہیں کیا ہو گیا؟ تم امن کے زمانے میں جنگل کے شیر ہو جس کی نظر میں ہر وقت برائی ہو۔ تمہاری مثال ان لومڑیوں کی طرح ہے کہ جب انہیں جنگ کے لیے بلایا جاتا ہے تو وہ دُم دبا کر بھاگ جاتی ہیں۔ تمام زندگی تم میں کوئی ایسا شخص بھی نہ پایا جس پر میں اعتماد کر سکوں۔تم ایسے سوار نہیں ہو جس کے پاس پناہ ڈھونڈی جا سکے۔ تم ایسے عزت دار نہیں ہو جس کے پاس پہنچ کر کوئی شخص اپنی عزت بچا سکے۔ خدا کی قسم! تم میدانِ جنگ کا بدترین کوڑا کرکٹ ہو۔ تم کسی کو دھوکہ نہیں دے سکتے بلکہ دھوکہ کھانا خوب جانتے ہو۔ تمہارے ہتھیار بیکار ہو چکے ہیں اور تم خود گھبراہٹ میں مبتلا ہو۔ تم غفلت میں مبتلا ہو اور تمہیں اس غفلت میں چھوڑ کر سویا بھی نہیں جا سکتا۔ یاد رکھو!جنگ میں جو شخص ہر وقت بیدار رہتا ہے، اس کی عقل بھی بیدار رہتی ہے۔جو شخص بے فکر ہو کر سو جائے گا وہ ضرور ذلیل ہوگا اور حملہ آور غالب آ جائیں گے اور مغلوب شخص پر قہر توڑا جائے گا اور اس سے سب کچھ چھین لیا جائے گا۔ میرا تم پر ایک حق ہے اور تمہارا بھی مجھ پر ایک حق ہے۔ تمہارا وہ حق جو مجھ پر لازم ہے وہ یہ ہے کہ جب تک میں تمہارے ساتھ رہوں تمہیں نصیحت کرتا رہوں، تمہارا حصہ تمہیں دیتا رہوں اور تمہیں تعلیم دیتا رہوں تاکہ تم جاہل نہ بن جاؤ۔ تمہیں ادب سکھاتا رہوں تاکہ تم تعلیم حاصل کر سکو۔ میرا تم پر حق یہ ہے کہ تم میری بیعت کو پورا کرو اور میری موجودگی اور عدم موجودگی میں میرے خیر خواہ رہو۔ جب بھی میں تمہیں دعوت دوں تو اسے قبول کرو اور میں تمہیں جو حکم دوں اسے بجا لاؤ۔ اگر اللہ کو تمہارے ساتھ کچھ بھلائی مقصود ہے تو تمہیں چاہیے کہ جس کام کو میں برا سمجھوں اسے چھوڑ دو اور جسے میں پسند کروں اسے اختیار کرو۔ تو تم جس شے کے طلبگار ہو اسے پالو گے اور جو تم سوچتے ہو اسے حاصل کر لو گے۔‘‘ (تاریخ طبریؒ، جلد 3، حصہ دوم، صفحہ 290-291)