شرح بسم اللہ الرحمن الرحیم SHARAH Bismillah Al-Rahman Al-Rahim

بسم اللہ کے باء کے نقطہ سے مراد انسانِ کامل کا قلب بھی ہے ۔قرآن کا تمام علم انسانِ کامل کے ’قلب ‘ میں مجتمع ہے اسی کے متعلق حدیثِ قدسی ہے :
 نہ میں زمین میں سماتا ہوں اور نہ آسمانوں میں لیکن بندہ مومن کے دل میں سما جاتا ہوں۔   
انسانِ کامل کا قلب کائنات کا وہ مقام ہے جہاں ذاتِ حق تعالیٰ کی سمائی ہے۔ انسانِ کامل کا قلب ہی وہ نقطہ ہے جہاں اللہ اور اس کا تمام علم مرکوز ہے۔ قرآن کا علم ہو یا دوسری الہامی کتب کا، خلق کا علم ہو یا خالق کا، دنیا کا علم ہو یا آخرت کا، سب اس کے قلب کے نقطہ میں جمع ہے۔ تمام علم کا مرکز بھی وہی ہے اور دنیا میں تمام علم اسی ایک نقطہ سے پھیلا ہے۔ انسانِ کامل کا قلب وہ جگہ ہے جہاں انوارِ ذات نازل ہوتے ہیں اور اس کی وسعت کا بیان و اندازہ نہیں کیا جا سکتا۔ حدیثِ نبویؐ ہے :
مومن کا قلب اللہ کا عرش ہے۔
قرآنِ مجید میں ارشادِ باری تعالیٰ ہے :
اور ہر چیز کو جمع کر رکھا ہے ہم نے امامِ مبین میں ۔(سورۃ یٰسین ۔ 12)

سلسلہ سروری قادری کے موجودہ امام سلطان العاشقین حضرت سخی سلطان محمد نجیب الرحمٰن مدظلہ الاقدس اپنی مایہ ناز تصنیفِ مبارکہ ’’شمس الفقرا ‘‘ میں فرماتے ہیں :
اس آیت میں’ امامِ مبین ‘ سے مراد انسانِ کامل ہے۔ اللہ تعالیٰ نے اپنے ہر امر، حکم اور اپنی پیدا کردہ کل کائنات کو ایک لوحِ محفوظ جو کہ انسانِ کامل کا قلب ہے ، میں محفوظ کر رکھا ہے ۔ (شمس الفقرا)

 حضرت امام حسینؓ اپنی تصنیف ’’مرآۃ العارفین ‘‘ میں  بسم اللّٰہ  کی شرح بیان کرتے ہوئے فرماتے ہیں :
پس با ء کے نقطہ سے مراد وجود کا نقطہ ہے اور بسم اللّٰہ  کی باء سے مراد دوسری اُمّ الکتاب ہے اور وہ قلم ہے اور بے شک وہ( یعنی قلم) نقطہ وجودیہ میں مندرج ہے (درج کی گئی ہے ، داخل ہے )اور بسم اللّٰہ  سے مراد تیسری امّ الکتاب ہے اور وہ عرش ہے اور بے شک عرش اس عقل میں مندرج ہے جس کو قلم کہتے ہیں ۔ 

حضرت امام حسینؓ نے اس قول میں باء کے نقطہ کو’’وجود کا نقطہ‘‘ قرار دیا ہے۔ تمام وجود کی ابتدا نورِ الٰہی کے نقطہ سے ہوئی ۔ اس لحاظ سے پہلی اُمّ الکتاب ‘ یعنی وجود کا نقطہ ’’نورِ الٰہی ہے ۔ نورِ الٰہی سے نورِ محمد یا قلم یا عقل کا ظہور ہوا۔ اسی نسبت سے نورِ محمد کو دوسری اُمّ الکتاب کہا گیا ہے۔ نورِ محمد اپنے ظہور سے قبل نورِ الٰہی میں پوشیدہ تھا۔ لہٰذا حضرت امام حسینؓ کے اس قول کی وضاحت ہو گئی کہ باء اپنے نقطہ میں پوشیدہ تھی۔ جب نورِ محمد اپنی ذات میں فراخ ہوا تو اس سے ظہور ہوا روحِ قدسی کا۔ روحِ قدسی جس سے تمام ارواح کا مادہ بنا، آغاز ہے موجوداتِ عالم کا۔ اس لحاظ سے یہ بسم اللّٰہ  ہے جس سے ہر کام کی ابتدا ہوئی۔ اس لحاظ بسم اللّٰہ  تیسری ام الکتاب ہے۔ روحِ قدسی کا نورِ محمد میں پوشیدہ ہونا اس قول کی وضاحت کرتا ہے کہ بسم اللّٰہ  ’’باء‘‘ میں پوشیدہ ہے۔ دراصل جو شے جہاں سے ظاہر ہو ئی ، ظہور سے قبل اسی میں پوشیدہ تھی جیسے بچہ اپنے ظہور سے قبل ماں میں پوشیدہوتا ہے اور درخت بیج میں۔ روحِ قدسی اگر بسم اللّٰہ  ہے تو تمام ارواح سورۃ فاتحہ ہیں اور یہاں اس قول کی وضاحت ہو گئی کہ سورۃ فاتحہ بسم اللّٰہ  میں پوشیدہ ہے یعنی تمام ارواح روحِ قدسی میں پوشیدہ ہیں۔ اس انتہائی باریک نقطہ کو یوں سمجھا جا سکتا ہے تمام ارواح روحِ قدسی ( جسے عرش کے مشابہہ کہا گیا ہے اور تیسری ام الکتاب ہے) میں پوشیدہ ہیں، روحِ قدسی نورِ محمد ( جسے قلم یا عقل کے مشابہہ کہا گیا ہے جو دوسری ام الکتاب ہے) میں پوشیدہ ہے ، نورِ محمد نورِ الٰہی (جسے وجود کا نقطہ کہا گیا) میں پوشیدہ ہے ۔ اور اسی ترتیب کے لحاظ سے تمام سورتیں سورۃ فاتحہ میں پوشیدہ ہیں، سورۃ فاتحہ  بسم اللّٰہ  میں ، بسم اللّٰہ  باء میں ، اور باء اپنے نقطہ میں پوشیدہ ہے ۔  

حضرت امام حسینؓ مرآۃ العارفین میں بسم اللّٰہ  کی شرح کے متعلق فرماتے ہیں :
’’بسم اللّٰہ  جس کو اُمّ الاُم کہتے ہیں ، دو قسم پر منقسم ہے جس میں سے ایک قسم ذات کے متعلق ہے اور وہ ’بسم ‘ ہے اور دوسری قسم صفات کے متعلق ہے اور وہ الرحمن الرحیم ہے اور( ایک قسم) جو ان دو کے درمیان ہے وہ ان دو قسموں کی جامع اور ان دونوں کے مقابل ہے اور یہ دونوں قسمیں اس کے بیچ جامع ہیں اور وہ اللہ ہے۔ ‘‘ 

بسم اللّٰہ الرحمن الرحیم  کی شرح کو سمجھانے کے لیے حضرت امام حسینؓ نے بسم اللّٰہ  کو دو قسموں میں تقسیم کیا ہے اور ان دو قسموں کو جوڑنے والی ایک برزخ ان دونوں کے درمیان ہے۔ پہلے حصہ میں ’’بسم‘‘ (یعنی اللہ کے اسما) کو رکھا ہے۔ دوسرے حصہ میں ’’الرحمن الرحیم‘‘ کو رکھا ہے جن سے اشارہ تمام صفاتِ الٰہیہ کی طرف ہے۔ یہ اسما و صفات جمع ہو گئے مقامِ برزخ یعنی انسانِ کامل میں۔ اس حصہ کو ’’اللہ‘‘ کے نام اور ذات سے موسوم کیا ہے جیسا کہ علامہ ابنِ عربیؒ فصوص الحکم میں فرماتے ہیں :
پس کامل اکمل اور مکمل وہ شخص ہے جو عالمِ اجسام سے ترقی کر کے مرتبہ احدیت میں پہنچ جائے اور تمام صفاتِ الٰہیہ سے متصف اور موصوف ہو جائے جیسا کہ حدیث ہے کہ  تخلقوا باخلاق اللّٰہ  (ترجمہ: اللہ کے اخلاق (صفات) سے متصف ہو جاؤ)۔ صفاتِ الٰہیہ بعض جلالیہ ہیں اور بعض جمالیہ ہیں۔ عارف کامل دونوں کا مظہر ہے مگر درحقیقت یہ کمال اس ذات کو حاصل ہے جس کا نام اللہ ہے ۔ یہ ذات کا وہ اسم ہے جو جمیع صفات اسما و صفات کا جامع ہے۔ مخلوقات میں اسم اللہ کا اطلاق صرف اور صرف جناب سرورِ کونین ؐ پر صادق آتا ہے کیونکہ حضور علیہ الصلوٰۃ والسلام اللہ تعالیٰ کے لیے مرآتِ تامہ (مکمل آئینہ) اور مجلیٔ اعظم ہیں ۔ (فصوص الحکم والا یقان)